Martin Leuthold creescha l’opulenza per Origen
Fin avant paucs onns ha el creà tailas per Dior, Armani, Chanel u Vivienne Westwood. En il fratemp lavura Martin Leuthold bunamain exclusiv per Origen. Il designer da textilias fa costums pumpus e spectaculars per ils tocs che l’instituziun culturala dal Surses represchenta. En pli creescha el tapetas per ils hotels u las villas che Origen restaurescha. Ch’ins sa senta uschè bain per exempel en il Hotel Liun a Mulegns ha da far bler cun las colurs u insumma l’interiur ch’el tscherna per mintga singula stanza.
18 costums èn da vesair en il foyer dal Square a l’universitad a Son Gagl. Igl è ils costums da l’opera «Apocalypsa» che Origen ha represchentà pliras giadas. Mintga costum è in unicat. Ma betg mo gliez. Per part èn perfin las tailas vegnidas stgaffidas aposta.
La FMR ha inscuntrà Martin Leuthold a Son Gagl. Dapi il 2009 creescha el ils costums per Origen. La pompusadad ed opulenza da bleras operas u teaters che impressiunescha visitaders e visitadras èn d’engraziar per ina buna part ad el.
Durer, El Greco e Dali
Nair, grisch ed argient èn las colurs dominantas per ils vestgids dals chantaduras e da las chantaduras da la «Apocalypsa». Mintga vestgì è cusì cun in’autra taila. Ina taila è tessida cun launa grossa plain zoclas nairas che dattan ina apparientscha selvadia. In lung vel elegant consista da pitg franzos. Ed or da la taila d’in auter vestgì glischan fils dorads entessids.
Blers detagls n’èn betg immediat vesaivels. Motivs da l’apocalypsa dad Albrecht Durer èn per exempel stampads sin in toc vestgì. Sin auters cumparan elements dals picturs El Greco ubain Salvador Dalì ch’èn era sa fatschentads cun la fin dal mund. Il muster dad ina rassa lunga, eleganta mussa rument da rachetas che circulescha en l’univers e smanatscha la vita terrestra.
Cun s’approfundar en ils detagls daventa cler: Mintga vestgì è fatg aposta per la persunalitad d’in chantadur u d’ina chantadura. E cun mintga costum raquinta Martin Leuthold ina atgna istorgia. El fa quai plain gust e raffinezza – e gugent era a moda divertenta.
Ma pertge dovri insumma tants detagls? Ils aspectaturs na vesan gea betg tut quai. «Els als sentan», è Martin Leuthold persvadì. Era sch‘in aspectatur na sajan betg pertschert dals blers detagls ch’i stettian davostiers – insumma tar l’entira producziun – furmia la summa da tut la forza impundida ina ovra cumplessiva. E lezza fetschia smirvegliar l’aspectatur.
Enconuschì l’emprim la mamma
Co che Martin Leuthold è insumma vegnì tar Origen è era ina istorgia per sasez. Igl è stà il 2007. «La designra Christa Carouge m’aveva dumandà, sch’jau la gidia da far in kimono per in teater a la festa da crap a Bivio. Jau hai creà ina taila cun bleras fluras alpinas», raquinta Martin Leuthold. Ina dunna a la festa è vegnida attenta sin els entras quest kimono ed als ha envidads da vegnir a guardar sia atgna lavur – tarpets e cuvertas da launa-nursa.
Questa dunna è stada Lucia Netzer, la mamma da Giovanni Netzer. Il creatur da textilias è stà impressiunà ed ha suenter sez fatg emprovas cun laschar surcuser ina rasada da launa-nursa. Lezza giada n’ha el betg sminà ch’el lavuria in di stretgamain ensemen cun questa dunna.
Pli tard survegn la firma Jakob Schlaepfer, nua ch’el lavura, in e-mail dad in um che dumonda, sch’el dastgia forsa avair tailas per ina opera en las muntogna. Talas dumondas per textilias gratuitas survegn la firma bunamain mintga di. Tgi che veglia tailas gratuitas, stoppia sez vegnir tar els, scriva Martin Leuthold enavos. L’autra damaun cumpara Giovanni Netzer en la renumada chasa da textilias a Son Gagl.
Far costums en tutta furtina
«Jau n’aveva anc mai udì insatge dal festival Origen. E qua sesa in carstgaun visavi mai e raquinta durant baiver café da l‘opera Samson che duai vegnir represchentada en il chastè da Riom. El è in incredibel narratur dad istorgias e raquinta uschè persvadent e plain maletgs ch’ins na po strusch pli dir Na», sa regorda Martin Leuthold.
Il creatur da textilias skizzescha intginas propostas per costums ed ha gia ideas per laschar crear tailas en l’Italia. Sin la dumonda sin cura che ils costums stoppian esser pronts, respunda Giovanni Netzer: «Venderdi saira èsi premiera.»
Quatter dis pli tard daventa la premiera da Samson in grond success – era grazia als costums che Martin Landolt han concepì en tutta furtina cun agid da plirs da ses collavuraturs e cun Lucia Netzer che ha cusì tut.
Enritgint per omadus
«Dapi lezza giada ans enconuschain nus ed igl è ina amicizia e constellaziun ch’i na dat betg uschè savens en la vita», di Martin Leuthold. «Sch’igl è per omadus enritgint, èsi nunditg bel da pudair lavurar uschia.»
Nundumbraivels costums ha el creà en il fratemp per Origen – adina senza paja. E dapi sia pensiun avant sis onns ha el perfin intensivà ses engaschi. Mintga gievgia va el a Savognin ad ina sesida cun Origen. Lura na vai betg mo per costums, mabain era per renovaziuns. Gist sin rucca stat la dumonda co sviluppar enavant il Hotel Piz Mitgel u il Hotel Pianta a Savognin.
Gia per il Hotel Liun a Mulegns ha Martin Leuthold creà tapetas, tschernì colurs, laschà fabritgar tarpuns e procurà per l’interiur. «Sco uman creativ na pon ins betg chalar da lavurar», di el e sa legra.
18 unicats ed il saut dals morts
Fin la sonda proxima èn anc exponids ils 18 costums dad Origen a l’universitad da Son Gagl. Els èn da vesair en il foyer dal bajetg Square. Mintga costum è in unicat ch’è vegnì stgaffì aposta per l’opera «Apocalypse». Atgnamain aveva Martin Leuthold concepì ils costums per las preschentaziuns il 2017 en la Tur cotschna sin il Gelgia. Paucs dis avant la preschentaziun èsi dentant stà cler, ch’ins stuvera desister dals costums opulents pervi dal plaz restrenschì. Questa stad ha Origen dentant anc ina giada mussà la «Apocalypse» – questa giada cun ils costums.
Questa saira preschenta Origen da reminent il «Saut dals morts» a Son Gagl. La represchentaziun ha medemamain lieu en il foyer dal Square en la vischinanza dals costums exponids.
Il «Sautar dals morts» dad Origen cumenza a las 20.00 en il Square a l’universitad da Son Gagl. Da las 19.00 datti anc ina introducziun.
Dapli ch’in cussegliader
Dapi il 2009 «cusseglia» Martin Leuthold Origen en dumondas da textilias, stat scrit sin la pagina d’internet da la instituziun culturala dal Surses. Gliez è ina brava minimalisaziun. Il creatur da textilias fa sa chapescha bler dapli che mo da dar dus u trais cussegls.
El ha las ideas per ils costums – spectaculars, extraordinaris ubain nunconvenziunals – che segnan las represchentaziuns dad Origen. Per part lascha Martin Leuthold taisser las tailas aposta. El posseda numerus contacts tar tessarias u glieud dal fatg ch’el motivescha medemamain da s’engaschar. Dapi sia pensiun avant sis onns lavura il creader da textilias anc dapli per Origen – era per la restauraziun da villas e hotels.
Las tapetas, ils tarpuns u la cumposiziun da colurs en il Hotel Liun a Mulegns èn marcads da ses stil. Gist era las tapetas èn aposta vegnidas designadas e producidas per quest interiur.
Martin Leuthold ha lavurà bunamain 50 onns en la firma da textilias Jakob Schlaepfer a Son Gagl. El è stà directur creativ e cun ses team ha el fatg mintg’onn passa milli tailas per il mund da la moda e da la haute couture. Per sia ovra da vita è el vegnì onurà il 2013 cun il Grand Prix Design da l‘Uffizi federal da cultura.
Gust da leger dapli?