Immo Invest Partner ei concuors – tgei succeda ad Acla da Fontauna?
La Immo Invest Partner AG ei concuors, respectiv en liquidaziun. Ella ei la possessura digl areal e dil project dil niev hotel Acla da Fontauna a Mustér. Co ei va vinavon cun quei project ei il mument incert. Il president communal da Mustér, René Epp, spera ch’el vegni tonaton realisaus, era perquei ch’ina instituziun internaziunala muossa interess da finanziar il project.
Ils 9 da november 2026 ei il concuors provisori dalla Immo Invest Partner AG da Glattbrugg vegnius publicaus digl Uffeci da concuors Wallisellen el Fegl ufficial dil Cantun Turitg ed el Fegl ufficial federal. Il medem di ha la dertgira da concuors dil Circuit giudizial Bülach aviert il concuors dalla societad. En sia communicaziun ufficiala scriva ella: «Sebasond silla decisiun dils 9 da november 2026 ha la dertgira da concuors dalla Dertgira districtuala Bülach aviert il concuors cun vigur naven dils 9 da november 2026 allas 11.00. Consequentamein ei la societad en liquidaziun.»
Consequenzas per Mustér?
La Immo Invest Partner AG ei la possessura digl areal e dil project pil niev hotel ad Acla da Fontauna a Mustér. «En vesta alla procedura da concuors ch’occuora san ils investurs dil hotel Acla da Fontauna buca prender ufficialmein posiziun», scriva il president communal da Mustér, René Epp, sin damonda da FMR/RTR. Suenter haver consultau ils investurs pren René Epp posiziun davart la situaziun cul concuors: «Ils investurs han orientau immediat la vischnaunca a moda proactiva. Nus deplorein naturalmein la situaziun finanziala actuala ch’ei malguessa e sperein ch’ils investurs vegnien da liquidar quella ton pli spert. Da menziunar ei che la procedura da concuors ei aunc buca terminada e ch’ei vegn inoltrau in recuors da vart dils investurs. L’intenziun dils investurs ei vinavon d’entscheiver culla realisaziun dil project la primavera 2027.»
Instituziun interessada
La vischnaunca da Mustér persequitescha vinavon la situaziun e spera ch’il project da baghegiar sappi vegnir realisaus igl onn vegnent. «Ton pli era pil motiv che nus havein survegniu quasi el medem interval in scriver ufficial davart in’instituziun internaziunala da finanziaziun che duei finanziar il project dil hotel niev», communichescha René Epp. Ins seigi gia dapi entgins meins el process d’examinaziun dil project en vesta da rescas, realisaziun e finanziaziun ed ins sappi spitgar ils emprems meins digl onn niev il resultat, respectiv la decisiun definitiva, schebein il project sappi vegnir finanziaus. Tenor René Epp ei il project hotel Acla da Fontauna da grond’impurtonza pil svilup regiunal. Il project planisau duei porscher 150 combras da hotel, rodund 50 habitaziuns administradas e 25 habitaziun secundaras cun cuosts totals da rodund 100 milliuns francs.
Investiu 20 milliuns francs
Il project dil niev hotel Acla da Fontauna cuoza dapi otg onns. «Duront quei temps han ils investurs surmuntau entgins obstachels, denter auter il recuors dalla fundaziun Helvetia Nostra. En lez han els survegniu raschun dalla Dertgira administrativa dil cantun Grischun. Plinavon han els exequiu la sanaziun da mieds nuscheivels e spazzau il hotel. Tut quei ha pretendiu temps», scriva René Epp e menziunescha ch’il contact denter ils investurs ed ils responsabels dalla vischnaunca seigi adina staus fetg aviarts e transparents. «La vischnaunca ha grond interess ch’il project vegni realisaus e spera ch’ei reusseschi als investurs da reglar lur obligaziuns finanzialas. Ton pli ch’igl ei gia vegniu investiu rodund 20 milliuns francs el project», menziunescha il president communal. La vischnaunca speri che las damondas aviartas e la cuntinuaziun dil project seigien sclaridas entochen primavera proxima.
Liunga historia
Il hotel Acla da Fontauna ei vegnius aviarts 1971. Naven da lu entochen igl onn 2000 ei il baghetg cun 620 letgs staus occupaus da hosps dalla Belgia. En quei temps ei l’Intersoc stada l’affittadra dil hotel ch’era en possess d’Arnold Mathis da Cuera. Emprovas da far reponderar l’Intersoc sia decisiun, han giu negin success. Silsuenter ein differents investurs stai interessai vid il hotel. 2005 ein schizun profils per in hotel niev vegni tschentai, mo ord quei project da Züblin-Strabag SA ei tonaton daventau nuot. Propi en moviment ein novas ideas pigl areal lu vegnidas avon rodund diesch onns. Lu ha la «Societad da svilup dil project Acla da Fontauna» presentau alla vischnaunca in concept cun in hotel cun ina purschida da quater steilas e habitaziuns. Igl atun 2017 ha quella societad cattau in investur pil project: La Immo Invest Partner AG da Glattbrugg.
Els mauns dalla Immo Invest Partner AG
La Immo Invest Partner AG ha scaffiu in niev project cun hotel cun rodund 170 combras sco era 100 habitaziuns administradas e secundaras, pusseivlas da realisar sin fundament dil plan d’areal. Igl avrel 2022 ha la Immo Invest Partner AG informau publicamein che la cadeina da hotels Mövenpick che s’auda al concern Accor vegni a menar il hotel niev. Il project «Mövenpick Living Disentis», calculaus cun investiziuns da rodund 100 milliuns francs, vegni realisaus dall’Immo Invest Partner SA. Ils 26 d’uost 2023 ha la Immo Invest Partner AG envidau la populaziun da prender per ina davosa ga investa dil hotel. Silsuenter eis el vegnius spazzaus. Il mument dattan magliacs da betun manizzau ed igl areal sco tal aunc perdetga dil hotel d’antruras. Repetidamein ha la Immo Invest Partner AG sincerau ch’ella entscheivi prest a realisar siu project. (fmr/hh)
Gust da leger dapli?