Musica, il lungatg universal

«O Magnum Mysterium», «Eye of the Tiger», «Move on», in agen song dalla Band K!ss me. Lu in marsch da Georg Friedrich Händel ed ina canzun da Felix Mendelssohn Bartholdy. Lu puspei pop e rock: «Stick Season» da Noah Kahan, «In the stars» da Benson Boone, «Heaven» da Gotthard. Gl’auditori ha schau semegliar cuort. La baselgia claustrala dallas soras dominicanas ei lu era s’emplenida per quell’occurrenza, in e scadin saveva ch’ei seigi in gudiment. La Scola da musica Surselva ha envidau al concert d’advent e biebein 350 persunas ein vegnidas per tedlar e seschar menar d’in lungatg: la musica. Biars dils carschi ein stai surstar da quei ch’els han udiu e viu, affons e giuvenils che contan e sunan.

 Biebein 20 blocs

Sora Madlen Bütler, la representanta dalla claustra, ha fatg in beinvegni agl auditori. Quater gadas ha ella tuccau la scadiala sonora e schau vibrar il tun el spazi. Per mintga dumengia d’advent seigi ina battida, ha ella detg. Quei ritual ha aviert il concert. Ina roscha protagonistas e protagonists han cuntinuau. La musica dueigi arver il cor pigl advent e per bia sentupadas, ha la representanta dalla claustra fatg attent. Clau Scherrer, il menader dalla Scola da musica Surselva, ha aschuntau en siu plaid che far musica e cantar seigi enzatgei fetg urgent en quei temps ed en quei mund.

Gl’onn vargau ha la Scola da musica Surselva saviu festivar il giubileum da 50 onns. Oz eis ei ina instituziun indispensabla per la regiun tochen e cun Flem. «Musica ei identitad culturala, musica ei in lungatg», ein dus cavazins ord il maletg empalont da quell’instituziun. Quei lungatg ei staus el center al concert d’advent. Il program ha inclus biebein 20 blocs da tut gener. L’entschatta ha la band Brassorama culs instruments da stuors fatg. Els han sunau treis tocs. La fin ha la Scola da cant fatg cullas Luscheinas&Lodolas. Quella formaziun ha fatg in plascher agl auditori cun treis tocs festivs pigl advent.

Da solistas, trios tochen sextets

Terminau il concert ha la band Skylinewalkers  cun ina canzun che ha connex cugl advent: «Heaven» da Gotthard. Il stil sedifferenziescha, sco mintga producziun che musicantas e musicants, sunaduras e sunadurs, cantaduras e cantadurs, han presentau. Musica ei in lungatg universal, ella rimna carstgauns, sur culturas, stils e situaziuns. Il concert d’advent ha mussau quei da maniera impressiunonta, per exempel la gruppa da flautas, solistas e solists al clavazin, e cun ghitara . Schizun orchesters da combra, cun cellos e gegias, ha sunau e divertiu. Ed in trio da cantaduras ed in sextet da ghitaras, lu ina giuvna organista cun ina sonata da Mozart. Gl’auditori ha gudiu muments, suns e tuns d’ina generaziun che ha tschaffen dalla musica, il lungatg che tuts capeschan.