«Mes collega Sir Lindsay Hoyle»

«Era sche tut va in zic pli plaun ed in zic pli ditg tar nus: Nus dastgain avair confidenza en nossa democrazia ed en nossas instituziuns», ha ditg Silvia Hofmann en ses pled d’avertura il glidnesdi. La presidenta dal Cussegl grond ha era admonì ch’ins stoppia investir en la scolaziun dad uffants e giuvenils per ch’els emprendian da chapir, da differenziar e da s’infurmar.

La Gronda Britannia haja inventà il parlamentarissem en il 14avel tschientaner, ha ditg il glindesdi la politicra da la PS. Il House of Commons cun ses 650 parlamentaris vegnia presidiada «da mes collega Sir Lindsay Hoyle».Il «speaker» n’avevia pli baud betg mo l’incumbensa da presidiar la chombra parlamentara, mabain era da rapportar las decisiuns al retg u a la regina. «Ina incumbensa ordvart privlusa. Tranter ils onns 1394 e 1535 èn numnadamain vegnids stgavazzads betg main che set speakers suenter lur rapportaziun», ha ditg Silvia Hofmann.

Perquai stoppia in speaker anc oz far sco da sa defender energicamain, sche ses collegas al veglian manar sin la sutga presidiala. Sin questa sutga mainia il speaker las sesidas e guardia che las reglas severas nudadas sin 16 paginas – ­«nagins schals, nagins t-shirts, nagins chalzers da gimnastica» – vegnian resguardadas en il parlament. Il speaker controlleschia pia ch’il parlament sa cuntegnia correct, ha explitgà ­Silvia Hofmann. «Exact quai vegn era jau a far ils proxims quatter dis. Per fortuna è noss urden da gestiun in pau pli concis, ed il privel d’ina execuziun n’exista en noss cas er betg.»