Newsletter test 3-12-2024

In co-directori per chatscha e pestga

In duo directiv maina a partir dal 2025 l’Uffizi chantunal da chatscha e pestga. Il manader actual Adrian Arquint, ed il substitut actual Marcel Michel, lavuran davent dals 1. da schaner 2025 mintgamai cun in pensum dad 80 % en la funcziun da parsura da quel uffizi. Quai ha decis la Regenza e communitgà quest glindesdi quella midada.

La midada sin ina co-direcziun giustifitgescha il Chantun en sia communicaziun cun il fatg ch’igl haja dà ils davos onns adina dapli incumbensas per l’uffizi, ed uschia saja creschida la chargia da lavur. Intensiva saja cunzunt la lavur cun ils animals che sajan da return e procurian per conflicts, sco ils animals da rapina gronds, ils casturs e las ludras. Tenor il Chantun correspundia l’introducziun da questa co-direcziun tar l’Uffizi da chatscha e pestga a sia strategia generala, numnadamain da pussibilitar models da jobsharing e topsharing. (cdm/fmr)

«Mes collega Sir Lindsay Hoyle»

«Era sche tut va in zic pli plaun ed in zic pli ditg tar nus: Nus dastgain avair confidenza en nossa democrazia ed en nossas instituziuns», ha ditg Silvia Hofmann en ses pled d’avertura il glidnesdi. La presidenta dal Cussegl grond ha era admonì ch’ins stoppia investir en la scolaziun dad uffants e giuvenils per ch’els emprendian da chapir, da differenziar e da s’infurmar.

Musica, il lungatg universal

«O Magnum Mysterium», «Eye of the Tiger», «Move on», in agen song dalla Band K!ss me. Lu in marsch da Georg Friedrich Händel ed ina canzun da Felix Mendelssohn Bartholdy. Lu puspei pop e rock: «Stick Season» da Noah Kahan, «In the stars» da Benson Boone, «Heaven» da Gotthard. Gl’auditori ha schau semegliar cuort. La baselgia claustrala dallas soras dominicanas ei lu era s’emplenida per quell’occurrenza, in e scadin saveva ch’ei seigi in gudiment. La Scola da musica Surselva ha envidau al concert d’advent e biebein 350 persunas ein vegnidas per tedlar e seschar menar d’in lungatg: la musica. Biars dils carschi ein stai surstar da quei ch’els han udiu e viu, affons e giuvenils che contan e sunan.