Ün nouv impuls pella Butia Tarasp
Daspö divers ons ha la pitschna Butia Tarasp da cumbatter per si’existenza. Quist on prevezza üna gruppa da proget da dar in butia amo daplü spazi per l’inscunter pro ün cafè. Il nom dal proget: «Cafè|Butia».
Illa fracziun Tarasp – chi appartegna al cumün da Scuol – manca ün lö d’inscunter. L’ultima ustaria es serrada daspö plüs ons. Cumprar mangiativas e roba dal minchadi es però pussibel fin hoz. Ma la Butia Tarasp cumbatta fingià plüs ons per surviver.
Duos butieras in pensum parzial
Manada vain la butia dad üna cooperativa cun duos butieras ingaschadas in pensum parzial. Davart ils affars da la butia disch Riet Fanzun chi’d es commember da la gruppa da proget Cafè-Butia Tarasp da la cooperativa: «I nu va mal culla butia. Ma id es simplamaing uschea cha butias in cumüns chi nu sun plü uschè bain abitats, han fadia da surviver. Talas butias sun dependentas obain d’üna famiglia chi s’ingascha plainamaing o lura d’ün fit fich bass pellas localitats. Lura poja funcziunar. Ma id es adüna al limit.»
Per render plü attractiva la sporta voul la Cooperativa Butia Tarasp uossa far üna prosma stainta e cumplettar la butia existenta cun ün cafè plü grond. Il proget as nomna apunta «Cafè|Butia».
Daplü co be duos maisas
Actualmaing sun integrats illa butia eir ün fanestrigl da la posta ed ün chantun pell’infuormaziun turistica. Daspö ün pêr mais daja eir duos maisas ed üna maschina da cafè, dimena üna sort pitschen bistro. «Daspö cha nus vain quellas duos maisas, gira ün pa daplü in butia», disch Riet Fanzun, «lavuraints vegnan aint a las 09.00, uschea chi’d es qua o là bain impli ed i pudess perfin esser amo ün pa daplü spazi per quels giasts.» La gruppa da proget less perquai spordscher in avegnir ün cafè per var 20 persunas dad üna vart da la butia.
Sustegn finanzial dal cumün
Per realisar il proget vain fat quint cun cuosts totals da var 80 000 francs. Quels vöglian els ramassar cun donaziuns privatas. Tenor Riet Fanzun sustegna il cumün da Scuol il proget cun var 50 000 francs. Il cumün gnia eir incunter cul fit da las localitats chi sun in seis possess. El declera: «Nus vain eir pudü prolungar quel contrat da fittanza per desch ons. Uschea cha’l fit restarà bass. Quai ans dà la perspectiva chi s’es bun da surviver. L’ulteriur sustegn finanzial dal cumün es ün bel signal. I conferma cha’l cumün vezza l’importanza d’üna tala butia sco lö d’inscunter e da cumpras pel minchadi.»
La mira saja da cumanzar cullas lavurs dal proget «Cafè|Butia» l’utuon da quist on 2025 – e chi’s possa davo spordscher a partir da la stagiun d’inviern 2025/26 ün nouv lö d’inscunter per ün e minchüna a Tarasp.
Gust da leger dapli?