Conclus final davart NalpSolar ei aunc buca prius

Implonts gronds da fotovoltaica el rom dil SolarExpress ston furnir 10 % da lur energia ella reit entochen la fin da 2025. Quei ei ina pretensiun dalla Confederaziun. Cass cuntrari obtegnan quels projects negin sustegn finanzial. Gest tenor project munta quel a 60 % dils cuosts dil project. Grazia allas ovras da fotovoltaica grondas spera la Confederaziun da saver augmentar la producziun d’energia regenerabla, surtut igl unviern. En cumparegliaziun cun implonts da fotovoltaica ella Bassa han quels ellas muntognas in grond avantatg: leu dat ei dameins uras cun brentina ni tschaghera. La promoziun dils implonts gronds da fotovoltaica ha la Confederaziun lantschau cul SolarExpress e scaffiu persuenter la basa legala era pil sustegn finanzial.

Per 2000 casadas

In da quels projects gronds da fotovoltaica ei quel da NalpSolar sin intschess dalla vischnaunca da Tujetsch. El vegn projectaus dall’Axpo sin in plateau che schai dretg dil lag da fermada da Nalps dall’Ovra electrica Rein Anteriur SA (ORA), ina feglia dall’Axpo. Quei territori sin in’altezia da rodund 2000 meters sur mar s’auda alla ORA. La producziun installada digl implont indichescha l’Axpo cun otg megawatt. L’ovra duei producir igl avegnir annualmein rodund 11 gigawatt/uras electricitad. Quei corrispunda al consum d’electricitad da pli che 2000 casadas. Sco ins sa leger silla homepage dall’Axpo duei il terren cugl implont saver vegnir nezegiaus era igl avegnir sco pastira. L’infrastructura da NalpSolar duei cuntener 19 000 moduls solars sin ina surfatscha da rodund diesch hectaras.

Entschatta dallas lavur uonn

Sco quei che Jeanette Schranz dalla partiziun da communicaziun dall’Axpo ha detg sin damonda dalla FMR, sesanfla il project il mument ella fasa dall’acquisiziun: «La finamira ei da lantschar las lavurs da construcziun quest onn. Il conclus final dall’investiziun davart l’Axpo ei aunc pendents. Nus spitgein quel en cuort.» El rom dalla presentaziun dil project la fin da november 2022 quintava l’Axpo d’entscheiver cullas lavurs la primavera 2024. Malgrad quei retard di Jeanette Schranz: «Duess l’entschatta dallas lavurs entscheiver sco planisau quest onn, duess igl implont saver vegnir colligiaus ad uras culla reit. Consequentamein duessen las pretensiuns dalla Confederaziun vegnir ademplidas.» Davart il volumen d’investiziun ha ella fatg neginas indicaziuns concretas. Per cumparegliar: Igl implont da SedrunSolar el territori da Scharinas e Cuolm Val, medemamein sin intschess dalla vischnaunca da Tujetsch, ei calculaus cun cuosts da rodund 80 milliuns francs. El duei producir energia electrica per 6500 casadas, pia rodund treis ga dapli ch’il project NalpSolar. Sco Jeanette Schranz di, corrispunda il project NalpSolar alla damonda da baghegiar, respectivamein alla lubientscha obtenida persuenter.

Lubientschas ein avon maun

Per si’ovra NalpSolar dispona l’Axpo da tuttas lubientschas. La fin da matg 2024 ha l’interpresa retschiert quella dil cantun Grischun. Igl uost 2023 haveva la radunonza communala da Tujetsch approbau il project. Denter il conclus dalla vischnaunca da Tujetsch e quel dil Cantun ei la Corporaziun da dretgs dall’Alp Nalps e Tegia miez medemamein sefatschentada da NalpSolar. Purs ed artavels da Segnas, Mumpé Tujetsch ed Acletta a Mustér ein possessurs dils 84 dretgs da pasculaziun dall’Alp Nalps e Tegia Miez en Val Nalps e consequentamein era dil liug che duess vegnir nezegiaus per l’ovra da fotovoltaica. L’entschatta fevrer 2024 ha la corporaziun acceptau la cunvegnientscha cull’Axpo pertuccont la pasculaziun dil territori pertuccau dil project per l’ovra da fotovoltaica NalpSolar. 

Pli paucs nibels – bia sulegl

Dapi biars onns sefatschenta la perscrutaziun d’ideas co nezegiar meglier la forza dil sulegl per producir energia electrica. Staus involvius en quellas examinaziuns ei era igl Institut federal per la perscrutaziun da neiv e lavinas Tavau. Igl institut ha constatau ch’indrezs da fotovoltaica ellas Alps han in grond avantatg en cumparegliaziun cun quels ella Bassa. Ellas muntognas sa vegnir produciu siat ga dapli energia cun fotovoltaica ils meins december e schaner che ella Bassa. In dils motiv ein las biaras uras da sulegl, in auter la reflexiun dalla neiv che s’effectuescha positivamein silla producziun d’energia.