Ina persunalitad marcanta ha dau adia

Actualmein pendan en Surselva placats che rendan attent all’Opera Viva dalla stad proxima a Sursaissa. Il num digl artist che ha creau quella grafica enconuschan tuts: igl ei Rudolf Mirer. Gl’artist da Sursaissa creescha dapi 2006 il maletg da tribuna e placat tematic per la producziun. Dumengia eis el morts nunspitgadamein, sco sia famiglia scriva, en consequenza d’ina attacca dil cor. Rudolf Mirer, naschius ils 9 da fenadur 1937 a Cuera e carschius si a Val S. Pieder sco fegl d’in scolast oriund da Sursaissa, ha fatg ina carriera exemplarica da pictur-artist. Siu stil caracteristic enconuschan ils biars ed el vegn era taxaus, tuttina sco Alois Carigiet, sco ina dallas persunalitads marcantas dalla scena d’art dil Grischun.

Il gardist papal

Siu stil ha la scena d’art denton strusch renconuschiu. Aschia ha el mai retschiert gl’invit d’exponer sias ovras ella Casa d’art dil Grischun a Cuera. Persuenter pendan quellas en nundumbreivlas stivas e casas, Rudolf Mirer ei quasi daventaus ina marca. Siu stil marcant ha el presentau la davosa gada ils 28 da november 2024. Lu ha l’uniun Opera Viva presentau placat e maletg da tribuna ch’el ha fatg per la producziun dalla stad 2025. «Aida da Giuseppe Verdi ei ina bellezia historia per far in placat. Jeu haiel vuliu che quel exprimi era il giubileum dall’Opera Viva», ha el getg lezza gada a caschun dalla presentaziun a Cuera. Uonn festivescha Opera Viva il giubileum da 20 onns, per Rudolf Mirer eis ei stau il dieschavel e davos ch’el ha creau dapi 2006.

Rudolf Mirer ha giu ina via admirabla da pictur-artist. Suenter ch’el haveva absolviu la Scola d’art ha el luvrau la fin dils onns 50 sco illustratur ell’industria da textilias. Da 1962 tochen 1964 eis el staus gardist papal a Ruma ed ha surviu a dus papas, Gion XIII e Paul V. Quella experientscha a Ruma ha influenzau el fermamein ed enfirmiu el da daventar pictur-artist independent. Ils emprems onns seigien stai in dir cumpat d’existenza, ha el adina confirmau ellas publicaziuns da sias exposiziuns. Siu dun grafic ed illustrativ, mo era sia dilligenza e productivitad, ha purtau il success. Rudolf Mirer haveva in sensori exprimiu per concarstgauns ed ambient. Figuras da carstgauns, cunzun dunnas cun fatschas marcantas, mo adina era adina animals selvadis e natira, ha el malegiau cun lingias gradas e fermas colurs.

1986 ha il grond success entschiet

Siu stil ha la scena d’art giudicau sco grafica. Da 1964 tochen 1995 ha el viviu a Zernez nua ch’el luvrava en siu agen atelier. Gl’onn 1986 ha il Seedamm Center a Pfäffikon/Sviz mussau l’emprema gada l’ovra cumplessiva da Rudolf Mirer. Igl ei stau l’entschatta dalla gronda carriera naziunala ed internaziunala. 1996 ha el fatg l’ovra «At home all over the world» per las Naziuns Unidas, marcas postalas per la posta svizra ed autras naziuns ha el illustrau. Sias litografias ein schizun vegnidas en moda e gl’artist grischun ha retschiert numerusas distincziuns e premis. El ha buca mo creau pil «grond mund», mobein era per uniuns localas e regiunalas, per exempel bandieras e placats.

Sco persuna religiusa ha el era giu adina in affinitad pigl art cristian. Sco anteriur commember dalla Guardia svizra papala ha el adina puspei creau marcas, bandieras e grafica per giubileums e commemoraziuns historicas. Il Vatican ha undrau el 2017 culla medaglia «Commendatore dell’ordine San Silvestro Papa». Avon zacons onns ha la malsogna Morbus Parkinson entschiet ad influenzar siu mintgagi. Malgrad quei ha el buca calau da malegiar. Il placat e maletg da tribuna per Aida 2025 dall’Opera Viva Sursaissa ei siu davos relasch artistic. Dapi 40 onns ha siu frar Thomas Mirer assistiu e promoviu el sco manager.