«Buca tuts han bugen truffels»

Jasmin Arpagaus meina dapi 15 onns l’ustria Piazza a Laax Murschetg. Igl ei il local popular e frequentau alla staziun a val dallas pendicularas. Duront l’jamna dil Laax Open eis ei la basa da diesch teams internaziunals.

parter

Gl’onn 2010 ha ella surpriu il menaschi sco giuvna cuschiniera. Tschun onns pli tard ha la Gruppa Arena Alva concepiu quel cumplettamein da niev, dapi lu ei il Piazza a Laax Murschetg il punct da referenza. Skiunzs che partan viers il Crap Sogn Gion fixeschan in termin aschia: «Allas 16.00 avon il Piazza. Semegliont alla staziun da Turitg ni Berna ei il local il «quadrel» da s’entupar, in liug tschercau per giuven e vegl. «Gie, quei ei aschia», conferma l’ustiera Jasmin Arpagaus. La dunna da 35 onns ei carschida si a Sagogn ed ha fatg gl’emprendissadi ella gastronomia. Ed ei restada fideivla a quella branscha. Quei hagi ses motivs, tradescha ella alla FMR, «ins ha da far cun glieud, sa duvrar ils lungatgs ed ei vegn mai lungurus».

Ils Asiats sceptics

La stagiun d’unviern ei lunsch ora la ferma per la Gruppa Arena Alva. Sur las fiastas e la scumiada digl onn ei l’aura stada favureivla, aschia che las pendicularas han registrau mintga gi ella media biebein 15’000 persunas sillas pistas. La gastronomia ha profitau da quei, e Jasmin Arpagaus ha gudiu da preparar il buffet e survir massa glieud. Suenter Buania eis ei vegniu pli ruasseivel, era el Piazza. Gia la proxima occurrenza ei denton vegnida en vesta: Il Laax Open 2025. Uonn organisescha la Gruppa Arena Alva la dieschavla gada quell’occurrenza (detagls mira box). L’ustria da Jasmin Arpagaus setransforma per in’jamna en ina basa da provediment. «Nus survin mintga sera 160 tochen 170 tscheinas». Il Piazza ei in dils locals ufficials per las equipas internaziunalas. La sera, cu atletas ed atlets cun lur schefs da squadra, gidontras ed assistents, tuornan dil Crap Sogn Gion, san els esser denter els, guder il quatier da proviantar e la cumpignia.

«Cursera dat ei rösti, cun barsau da carn manizzada, e broccoli sco legums», ha l’ustiera tradiu margis suentermiezgi alla FMR. «Han ils Chines bugen quei?» ei la damonda innocenta dil redactur. Jasmin Arpagaus ri e dat il tgau. Ella enconuscha ses utschals, respectiv ses hosps. «Els vegnan mintg’onn cheu el Piazza. Gl’emprem onn eran ils Asiats veramein empau sceptics cun nossas tratgas continentalas», raquenta l’ustiera. Ils emprems onns eri propi buca sempel da porscher quei che plaschevi a tala glieud, denton malgrad lur dubis empruavien els tuttina.

Ils «utschals da bov»

Daferton survescha l’ustiera dil Piazza a ses «utschals» da tut il mund buca mo ris, lentiglias, salatas e terc. «Cun sia squadra da sis tochen otg persunas cuschina e survescha ella la dieschavla gada al Laax Open. Tier ella vegnan denter auter las equipas dalla China e dalla Corea, e glieud d’autras naziuns, per exempel dalla Scandinavia. Stars sco Ayumo Hirano dil Giappun, gl’Australian Scotty James, Iouri Podladtchikov, Shaun White, Anna Gasser ni Andri Ragettli vegnan e van senza ch’els han attenziun ni service special. Igl ei hosps sco auters dil Piazza. Jasmin e sia squadra prepara mintga gi denter 160 e 170 tscheinas per diesch teams internaziunals.

 Il lungatg da communicaziun general el piazza ei gl’engles. Las squadras che prendan part mintg’onn alla concurrenza d’aissa e freestyle pli prestigiusa dil mund dueien era emprender d’enconuscher la culinarica locala. Cullas tscheinas emprova Jasmin Arpagaus tuttina da prender risguard – schi bein sco ei va. Gia avon ch’il Laax Open ha entschiet, il schaner 2016, vegnevan las atletas ed ils atlets tier ella el Piazza. Demai ch’ella enconuscha biaras persunas dall’equipa sa ella era da lur disas ni gusts culinarics. «Jeu sai per exempel tgi che maglia truffels e tgi buc, e tgi che vul sosa da salata senza ischiu, ni autras atgnadads.» Oz sa ella scriver silla carta da menu ina lasagne, in gratin da truffels, ris cun stigliau e bliuschas, senza ch’ella leventa ina crisa ella squadra chinesa. En connex culs nums dallas tratgas raquenta ella d’ina malcapientscha ch’ei ha dau inagada pervia dalla carn silla carta. «Nus havein scret ‘Fleischvögel’ cun buglia da truffels. Quei ha lu enzatgi translatau cun ‘Beefbird’, quei ha irritau e duvrau ina declaronza speciala a bucca. Ch’ella hagi buca cuschinau utschals da bov ha l’ustiera spert saviu cumprovar.

Laax Open – in festival d’unviern
Laax vala ella sparta da snowboard e freestyle defintiv sco superlativa. Empau sco Wimbleton el tennis ni Monte Carlo ella F1. La pli gronda mesapipa dil mund sil Crap Sogn Gion, cun ses 200 meters lunghezia, 22 meters ladezia e bunamein siat meters altezia, vul negin dils megliers sigliders dil mund munchentar. Quest’jamna ei quell’occurrenza la dieschavla gada. 1500 persunas acreditadas digl entir mund, campiuns mundials, olimpicons, cun glieud d’assistenza, dallas medias e sponsurs, separticipeschan al 10avel Laax Open 2025. Las concurrenzas sil Crap Sogn Gion, cullas selecziuns ella mesapipa ed el parc da siglir, ein bein el center. Dasperas dat ei in vast program accumpignont cun bien 60 occurrenzas en 18 localitads. Al final da notg, la sonda-sera, ein 10’000 persunas entuorn la mesapipa e mellis entuorn il parc da siglir.


Dapli dall’occurrenza gronda mira www.laax.com/open