LaaxPower SA spetga sin resultats

Tuttas proceduras per las lubientschas seigien finidas ed els disponien era d’ina lubientscha da baghegiar, conferma Stefan Bisculm, il plidader da Repower. La FMR ha vuliu saver dad el, sche sia interpresa e la Gruppa Arena Alva (GAA), sco partenarias da project, hagien sclariu la damonda dalla rentabilitad pil project sil Vorab. Il fenadur 2024 haveva Repower communicau ch’ella hagi retschiert la lubientscha da baghegiar e ch’ins astgi aschia quintar cun contribuziuns dil Solarexpress. La rentabilitad seigi denton la gronda sfida, ha l’interpresa communicau la stad vargada. La decisiun definitiva prendien las partenarias dil project suenter ch’ins hagi evaluau las offertas ligiontas e sclariu la summa dallas contribuziuns federalas.

Tests cun cabels innovativs

Daferton ei in miez onn vargaus. En scadin cass vulan las duas partenarias realisar, ella proxima vischinonza dalla staziun da muntogna dalla pendiculara Fuorcla-Vorab e culla proveditura locala Flims Electric sco menadra da project, gl’implont solar aultalpin. «Il motiv che nus havein aunc buca priu la decisiun e fixau ils termins ei cunzun da natira tecnica», conceda il plidader da Repower. Stefan Bisculm explichescha: «La tecnologia planisada pil cabel da quei implont solar ei reschnova, ella ha il grond avantatg ch’ella ei specialmein favureivla els cuosts ed agl ambient.» Repower seigi participada, ensemen cun autras interpresas, vid in implont da test el Valleis. Sin altezia aultalpina d’unviern veglien ins testar quella tecnologia nova ed aunc nunenconuschenta. «Nus vulein exnum integrar las experientschas el project sil Vorab», puntuescha Stefan Bisculm e gi vinavon ch’ins savess construir cunquei naven dall’entschatta in implont fidau e segirs per las relaziuns digl unviern aultalpin.

«Nus stein vinavon cumpleinamein davos il project Vorab», accentuescha il plidader da Repower alla FMR. Sin fundament dil liug optimal e cumpatibel cugl ambient, la pusseivladad da duvrar ina gronda part dall’energia gest el liug ed era pervia dil grond sustegn dalla vischnaunca da Laax taxeschien els il project sco fetg interessants. «Perquei havein nus fundau, ensemen cun nossas duas partenarias, la GAA e la Finanz Infra, la societad LaaxPower SA.» La Finanz Infra ei ina societad acziunara che s’auda allas treis vischnauncas Flem, Laax e Falera, ella finanziescha investiziuns el territori da skis.

Va il Solarexpress – senza success?

Egl artechel 71a dalla lescha federala d’energia ha la Confederaziun decidiu mesiras urgentas che gidan d’augmentar la producziun indigena. La strategia dil schinumnau «Solarexpress» duei garantir il provediment d’unviern. Societads ed interpresas interessadas dueien saver realisar spert grondas ovras solaras cun recavs naven da 10 uras GW. Tenor ordinaziun federala san projects cun tal scopo quintar cun contribuziuns tochen 60 % dils cuosts d’investiziun. Per survegnir las contribuziuns sto il singul implont denton producir silmeins 10 % tochen la fin dil 2025.

Pigl implont sil Vorab ei quella cundiziun strusch realistica, demai ch’ils tests ein aunc buca fini? Stefan Bisculm rispunda aschia: «Actualmein ei la resca gronda che nies project savess buca ademplir las cundiziuns dil Solarexpress. Senza las contribuziuns federalas fuss in menaschi rentabel buca pusseivel», remarca il plidader da Repower. Las partenarias dil project LaaxPower appelleschan alla politica. «Ins sto prolungir il termin da Solarexpress. Pertgei dano ils projects Madrisa e Sedrun ein tuts projects actualmein confruntai cul medem problem. Il termin dalla fin 2025 ei memia cuorts», declara il collaboratur da Repower. Sche las persunas cumpetentas da decider adatteschan buca quel, savessen tut quels implonts buca vegnir construi, demai ch’els fussen buca rentabels. Lu fuss il tren cul num Solarexpress partius. La breigia dalla Confederaziun d’augmentar la producziun interna fuss stada invana, senza success e diltut per nuot.