Lectura rumantscha 29-01-2025

Allegra chara lectura e char lectur. Ils temas dad oz giran per buns chaschiels, ina substanza ch’i fiss d’evitar cumplainamain, er en il chaschiel, e per ina malsogna che po gist infectar quels animals che pussibiliteschan ils buns chaschiels.

Café en il chaschiel

Ti mangias forsa mintgatant d’ensolver in toc chaschiel tar ina scadiola café. Ma mangiar chaschiel cun en café? Quai che tuna fitg experimental e da s’endisar, è lura era stà in flop da la chascharia Val Müstair. Persuenter han autras cumbinaziuns gì grond success, per exempel in chaschiel cun en vin. Il chaschiel «Tea Fondada» ha schizunt fatg il segund plaz tar ina concurrenza mundiala cun bundant 5000 chaschiels da 47 pajas, e quai senza en café.

Scumond da fluor – u tuttina betg

En in truclet en tes tschaler u en tia garascha sa chatta forsa er anc in tochet da quella tschaira magica, cun la quala ils skis da passlung glischnan er anc da temperaturas autas sco patins sur il glatsch. Ma quella tschaira cuntegn il nuschaivel fluor, perquai ha Swiss Ski scumandà en sias cursas quella tschaira. La dumengia passada al Surselva Maraton a Sedrun – ina cursa da Swiss Ski – èn quatter curriders vegnì disqualifitgads pervia da fluor sin ils skis. Ils disqualifitgads manegian ch’i na saja betg stà cler tenor la pagina d’internet dal maraton che tschaira cun fluor saja scumandada. Tenor Swiss Ski èsi cler. Ma tge ussa, avess’ins dastga u betg?

Vatgas cun lieungas che tatgan

La istorgia da Giusep Gherardi fa ina snavur. Las emoziuns dal Lumnezian commuventan. L’onn 1957 è el da giuven pastur sin l’alp Cassons sur Flem. El survegn gugent ils animals ch’èn si d‘alp cun el. Ma lura vegnan pliras vatgas malsaunas. La pel da la lieunga tatga. Il verdict: la zoppina. Varga 80 vatgas vegnan transportadas davent per lura las mazzar. E Giusep Gherardi resta enavos en quarantina e cun maletgs da sgarschur. E na vegn mai pli ad ir ad alp.

A revair e buna lectura.