Cura tgi igl cres sa sera
Igl concert da giubileum è en spezial – 50 onns siva tgi Augustin Bläsi ò fundo igl Chor da donnas Vaz seran dus dallas sias beadias, Lea ed Eva Bläsi, igl cres. Ellas sa participeschan numnadamaintg agls concerts giubilars digls 13 e 14 da zarcladour 2025 a Lantsch ed a Zorten scu solista, respectivamaintg pianista.
«Tgi nous dastgagn dar igls dus concerts an chella furma è ena bela istorgia», ò detg Lukas Moos, igl dirigent digl Chor da donnas Vaz, anvers la FMR avant ena prova a Lantsch. A caschung digl giubileum da 50 onns concertescha igl sies chor numnadamaintg an en arranschamaint angrondania. Chegl vot deir ansemen cun en chor viril scu er en orchester ad hoc – ma er cun participaziun da dus beadias digl fundatour digl Chor da donnas Vaz, Augustin Bläsi (1922 – 2012).
Tgi las dus cusregnas Lea ed Eva Bläsi sa participeschan scu solista e pianista, chegl sera quasi igl cres, uscheia Lukas Moos tgi dirigia siva da 18 onns igl Chor da donnas Vaz. Igls concerts giubilars igls 13 e 14 da zarcladour 2025 a Lantsch ed a Zorten (varda box) èn damai er per las giovnas Bläsi ena bela istorgia, scu chegl tgi Eva ò detg: «Igl è propi ensatge spezial da saveir tgi noss tat ò fundo chel chor avant 50 onns.» Ellas sezzas na vegian numnadamaintg betg propi gia la caschung da cantar cun el, uscheia Lea Bläsi (25): «Noss tat è mort avant passa diesch onns. Nous vagn damai betg schi bleras regurdientschas dad el. Scu tg’el cantava, vainsa dantant pudia vaseir sen videos.»
«La musica era fitg impurtanta»
E schibagn tgi las regurdientschas da lour tat n’èn forsa betg ple schi preschaintas, ins pò tuttegna constatar tg’el – Augustin Bläsi – ò do anavant ainten famiglia ed er a Lea ed Eva igl plascheir per la musica. I seia numnadamaintg sto ple tgi usito da cantar an famiglia, scu tgi Carmen Bergamin-Bläsi, ena feglia dad Augustin e cantadoura digl Chor da donnas Vaz, ò detg: «La musica era fitg impurtanta per mies bab ed uscheia ischan er nous unfants carschias se fitg musical. Nous tottas vagn amprandia en instrumaint e nous davan er pitschens concerts da famiglia.»
Gist scu tar lour onda Carmen ègl alloura er sto tar la generaziun suandonta, u bagn tar Lea ed Eva Bläsi. La musica seia quasi adegna en tema an famiglia, scu tgi Eva Bläsi ò explitgia: «Er nous ischan carscheidas se cun musica. E per exaimpel tar las festas da famiglia niva adegna canto e suno.» Damai na fogl er betg surstar tgi la musica è daple tgi angal en hobi per ellas. Dantant tgi Eva fò en studi da musica a Lucerna, lavoura Lea scu cantadoura libra e fò ena scolaziun scu organisatoura d’occurrenzas. Tg’ellas concerteschan ossa ansemen, chegl na seia pinavant navot nunusito, ò fatg a saveir Lea Bläsi: «Allas festas da famiglia vainsa nous dus adegna canto e suno ansemen.» E tgi chegl è ossa er sa do per igls concerts da giubileum digl Chor da donnas Vaz, chegl fò enorm plascheir a lour onda Carmen Bergamin-Bläsi: «Ia sung propi loscha tgi las mias nezzas sa participeschan ed ia sung angraztgevla tgi igl noss dirigent ò instrado chegl uscheia.»
Ena contribuziun per la pasch
A caschung digl sies 50avel anniversari dat igl Chor da donnas Vaz dus concerts: igls 13 da zarcladour 2025 allas 20.00 ainten la baselgia catolica a Lantsch ed igls 14 da zarcladour 2025 allas 20.00 ainten la baselgia catolica a Zorten. Lour concerts giubilars dat igl Chor da donnas dantant an en arranschamaint angrondania, numnadamaintg cun en chor viril ed en orchester ad hoc, cun las solistas Lea Bläsi (sopran) e Nora Bertogg (mezzosopran) scu er cun Eva Bläsi agl clavazign e Sebastian Guralumi all’orgla. Scu tgi’igl dirigent Lukas Moos ò detg anvers la FMR avant egna dallas davosas provas, seia igl chor pront ed igls tungs tschaintan, ma: «I mantga anc en po la luccadad. Nous stuagn aveir igl curasch da simplamaintg cantar.»
Rachintar en’istorgia
E tuttegna – igls concerts da giubileum seian daple tgi angal cantar, scu chegl tgi Lukas Moos ò explitgia: «Ia na vi betg simplamaintg far cantar ena canzung siva l’otra. En concert duess er rachintar en’istorgia u aveir en messadi – ed an chel cass duess mintga tung esser en messadi da pasch.» Igls concerts da giubileum stattan numnadamaintg sot l’ansagna dad «El cant dels occels», ena canzung populara catalana da Pablo Casals (1876 – 1973). Igl cellist catalan vegia exprimia cun chella canzung la resistenza an furma d’art, u bagn cun igl tschivlottar dad utschels, uscheia Lukas Moos: «Chella canzung mossa, scu tg’en pievel scatschea pò sa dustar, pero betg cun pleds, mabagn cun art.»
Sen igl program da concert sa cattan pinavant er igl «Nigra sum» da Pablo Casals u la «Consolaziun» da Gion Balzer Casanova e scu part principala la vespra an f dur da Michael Haydn (1737 – 1806).
Gust da leger dapli?