Anc anfignen la fegn da l’onn

Bunas novas ò la populaziun dallas treis vischnancas vaschignas betg survagnia l’emda passada cun ena brev da la Societad da consum Alvra-Surses.

Aint igl screiver da Roman Brenn, igl president dalla societad da consum è da liger tgi displaschevlamaintg ins vegia pigls 31 da december 2025 da sarar definitiv la buteia Prima a Sur. D’aveir da far chel zap seia betg sto simpel e chella realitad displaia cunzont fitg. Tiers grond angaschamaint digl team, digl sustign digl cumegn da Surses ed er davart dalla populaziun da Sur, Mulegns e Marmorera seia igls davos onns betg sto pussebel a lunga vista da sierar economicamaintg la buteia ed igl travagl.

En da set travagls da la societad

Ultra da chegl possa la societad da consum er betg chintar aint igl avigneir cun contribuziuns pigl deficit dalla buteia davart digl cumegn da Surses. La decisiun tgi la buteia Prima a Sur sera alla fegn da chest onn per adegna la sia porta ò caschuno cunzont tar la populaziun pi segls onns dallas treis vischnancas vaschignas per bler mal, d’ena vart alloura er per tgapientscha.

La buteia Prima è egna da set travagls tgi la Societad da consum Alvra-Surses magna ainten la regiun. Realitad è er tgi chella filiala fò igl pi pitschen stgamgiamaint ed ò anfignen oz angal survivia graztga alla bagnvuglientscha digl cumegn da Surses, graztga agls bungs affars dallas pi grondas filialas e betg igl davos dalla clientella fidevla.

Scu a Salouf

Gio avant pacas emdas è nia ancunaschaint tgi la Societad da consum Savognin e conturn sera alla fegn d’otgover la buteia Prima a Salouf, per sumigliaintas raschungs. Per gievgia seira ò la Societad da consum Alvra-Surses anvido la populaziun da Sur, Mulegns e Marmorera ad en inscunter ainten la buteia Prima a Sur,  noua tgi Roman Brenn igl president dalla societad e Daniel Wasescha igl president communal digl cumegn da Surses dattan pled e fatg an tgossa.