Il fuormeder da musclas rojelas

«Eau lavur gugent insembel cun atlets da professiun, quels haun ün böt e saun che chi drouva fin lo», declera Robin Städler, treneder persunel d’atletica, inventur d’ün sistem da fitness ed afferist. Sport d’eira già adüna important per l’hom da 54 ans. Insè vulaiva Robin Städler svessa dvanter skiunz da professiun. «Eau faiva cuorsas da skis cunter Bruno Kernen. Ma svelt d’he eau alura bado cha Kernen, Beltrametti e cumpagnia avaivan chammas scu bos-cha, eau pütöst be scu ün pel», s’algorda Robin Städler, chi’d es creschieu sü a Zernez. Uscheja saja sia motivaziun da vulair lavurer cun forza e musclas naschida. Già alura cun l’ideja dad esser ün di uschè ferm scu ün lutteder, do el tiers cun üna tschigneda. Zieva avair fat la matura al Lyceum Alpinum a Zuoz e la scoula da recruts è’l partieu in Austria a Vienna per stüdger sport.

Treneder dals atlets da listessa anneda

Il prüm ingaschamaint cha Robin Städler ho gieu zieva sieu stüdi, d’eira tar Swiss Ski. Tuot in üna vouta d’eira el treneder d’atletica da quels chi d’eiran aunz pochs mais auncha sieus concurrents. Düraunt tschinch ans ho’l ramasso experienzas, na be scu treneder d’atletica, scu ch’el quinta: «Eau d’he eir gieu da fer bgeras otras lavuors e sustgnair ils skiunzs sün pista», ma eir scu ir intuorn cun atlets chi haun success. «Cun quella squedra da skis d’eirans als gös olimpics e vains guadagno püssas medaglias.» Già ch’el vaiva eir fat tuot ils cuors scu treneder da skis, s’ho’l annunzcho per üna plazza scu coach da l’equipa da slalom. Ma l’organisaziun da Swiss Ski s’ho decisa per ün Austriac. Ed uschea d’eira temp per Robin Städler dad ir inavaunt.

Il sömmi da la NHL

Ün telefon dal anteriur treneder dal club da hockey da Tavo, Arno del Curto l’ho mno a sia prosma plazza. «Que es sto per me ün vaira success. Zieva 17 ans sainza titul ho il HCD finelmaing darcho guadagno ün, eir grazcha a mieu training. Que ho güdo ch’eau d’he pudieu cumanzer a lavurer tenor mia egna filosofia», admetta Robin Städler cun superbgia. Culs hockeyaners, chi vaivan bger mel u problems cun lur schnuoglia u lur iglias, ho’l per la prüma vouta pudieu pruver oura sieu sistem. Nempe da fer training da forza sün ün’assa cun üna rolla suotvart, uscheja cha que drouva eir ün bun equiliber da fer ils exercizis.

Ma Robin Städler insömgiaiva da pudair lavurer illa NHL. El vaiva già fat fagot – desdit la plazza tal HCD e do sü sia abitaziun – ma alura ho il club, inua ch’el füss sto impiego, ils New Yorker Highlanders decis dad ün di sün l’oter da desdir a lur inter persunel. Traunter oter eir a Robin Städler, sainza ch’el vess insomma miss ün pè sül continent da l’America.

Jörg Abderhalden e l’independenza

Ma pel treneder furber nu d’eira neir quista situaziun ün obstacul memma ot. «Cun que ch’eau nu vaiva niauncha pü ün’abitaziun, d’he pudieu ir a ster ün temp tar ün da mieus cliaints a Lucerna. E lo d’he alura cumanzo cun mieu start-up, il prüm be cun üna rolla da metal ed ün’assa or da lain pel equiliber», s’algorda Robin Städler vi da sieus prüms pass scu afferist. «La glieud intuorn me dumandaiva be: ‹Hesch dis Brett?›.» Ma el d’eira persvas da sia ideja. E da quel temp, l’an 2003 d’eira Robin Städler in Svizra ün dals prüms uschè numnos personal-trainers. Cun que cha’l lutteder Jörg Abderhalden ho cumanzo a lavurer cun Robin Städler ed es sün quella alura eir dvanto per la seguonda vouta, al ESAF 2004 a Lucerna, raig dals lutteders, ho quelo güsta do svung al treneder. «Eau vaiva già adüna cò e lo singuls atlets chi gnivan tar me ed ün pêr mandats tar differents clubs, ma propi la dretta lavur scu personal-trainer ho pür cumanzo zieva cha Jörg Abderhalden d’eira tar me.»

Armon Orlik ed ils atlets da professiun

Bainbod es dvanto our da sieu sistem cun la rolla e l’assa üna marca cuntschainta aint il muond da fitness. «Que stuvaiva esser qualchosa chi tuna ün po curius, ma chi fo listess sen», quinta il personal-trainer. «Sypoba es la scurznida da System-Power-Balance.» Eir cun sia cliantella saja que zieva gnieu interessant, quinta Robin Städler. «A partir da quel punct sun üna pruna differentas atletas ed atlets rivos tar me. Traunter oter la patinunza artistica Sarah Meier, ils hockeyaners Jonas Hiller, Timmo Helbling, Patrick Fischer e Thierry Patterlini, eir da quels chi sun zieva lur carriera illa NHL svessa dvantos treneders.» Ma eir atletas ed atlets, chi nun haun ünguotta da che fer cun patins sun rivos tar Robin Städler in sieu studio a Rapperswil. «Eau d’he accumpagno eir a divers chi sun gnieus tar me scu iffaunts u giuvenils ed haun uossa fat il sagl illas categorias da profis creschieus, que sun la giuvedra da tennis Celine Näf u il giuveder da badminton Joel König. Ma eir ils snowobardists Ladina e Dario Caviezel vegnan adüna darcho tar me.»

«Tals atlets da professiun es que uscheja cha lur corps sun lur chapitel, da quels staune piglier chüra e cun mieu training funcziuna que bain, sainza prievels. Anzi que güda perfin ad eviter differents mels», declera il treneder. E grazcha a sia collavuraziun cun Jörg Abderhalden da quel temp sun uossa eir ils lutteders da l’associaziun dal nordost (NOSV) traunter oter apunto eir Armon Orlik rivos tar Robin Städler.

Aunch’ün pilot da F1 füss cool

Eir Robin Städler ho lavuro cuntinuedamaing vi da sieu böt, eir scha que nun es adüna be ieu insü, do’l tiers. «Cun üna seguonda invenziun, ün apparat chi’s nomna gatepress am d’he eau pudieu preschanter illa emissiun ‹Höhle der Löwen› in Germania, ma displaschaivelmaing nun ho que funcziuno cun üna collavuraziun. Anzi que es sto üna da mias pü schnuaivlas experienzas.» Cun que cha’l deal nun ho funcziuno, hegia’l gieu ün pêr eivnas da’s remetter e chatter darcho nouva energia per fer inavaunt. Ma insè saja Robin Städler tuot cuntaint cun la situaziun da lavur scu ch’ella es. Ch’el lavura natürelmaing eir cun glieud, chi nu fo sport scu professiun. «Nus vains mincha di püs cuors da gruppa cun tschinch fin quindesch partecipants. E scha qualchün ho ün mel specific, pudains eir fer trainings individuels», quinta el. E sulet nun es Robin Städler neir pü in sieu studio, el ho eir fabricho sü ün’academia e daspö l’an 2006 scoula el ad ulteriurs treneders sün sieu sistem. Cha intaunt saja bod in mincha studio da fitness e fisioterapia illa Svizra üna rolla ed ün’assa tenor sia filosofia.

Che chi pertuocha differents sports ed atlets ho Robin Städler già vis da las tuottas, el ho perfin eir treno ün temp l’equipa naziunela da bob da Monaco. «Lo avaivans training illa halla da glatsch, ed alura gniva minchataunt eir il Princi Albert speravi a guarder che cha nus fains.». Da quel temp a Monaco hegia’l eir pudieu guarder tiers a la cuorsa da la fuormla 1. «Que chattess eau schont auncha fascinand da trener üna vouta uschè ün pilot.»