«Quei ei buca ina decisiun alla sperta»

Beinenqual ei vegnius cun damondas. Auters ein vegni per tedlar e s’informar – per aschia saver far in’atgna opiniun. La halla polivalenta a Flem Vitg ei s’emplenida sco mintgaton ils davos onns. L’orientaziun ha mobilisau 320 votantas e votants, vitier aunc 30 hosps e divers representants da medias. La suprastonza communala haveva tractandau la fatschenta ch’ei actualmein tema numra in ella regiun e sur quella ora. Las treis vischnauncas Flem, Laax e Falera vulan cumprar l’entira infrastructura turistica sil cuolm dallas Pendicularas Arena Alva SA. Tochen gliendisgis haveva la populaziun da Flem aunc buca retschiert informaziuns directas. Il messadi cul material da votar pertuccont quei project ha la suprastonza buca vuliu distribuir ellas casadas ensemen cun tschels projects ch’ein stai dumengia vargada en votaziun.

La glieud ha vuliu s’informar

La votaziun dil pievel pertuccont il deal da Flem, Laax e Falera cull’Arena Alva SA ha la suprastonza communala fixau sin dumengia, ils 26 d’october 2025. Aschia eis ei stau evident che tonta glieud ha vuliu s’informar directamein. «Margis vegn il messadi cullas presentaziuns e detagls ad esser cargaus silla pagina d’internet dalla vischnaunca», ha il president communal Christoph Schmidt empermess avon ch’el ha serrau la radunonza communala. El ha presentau la fatschenta ensemen culs presidents communals da Laax e Falera, Franz Gschwend e Norbert Good, sco era cul meinaproject Adrian Wolf, sco era cun Reto Gurtner, il president dil cussegl d’administraziun dallas Pendicularas Arena Alva.

Gia avon 20 onns ha la radunonza communala da Flem giu da discutar e prender posiziun tier ina tractanda semeglionta. Lu han las treis vischnauncas fundau la Finanz Infra ensemen cullas pendicularas. Per quei intent han ellas alimentau la firma nova cun in capital da 5 milliuns francs. A Flem haveva quella tractanda caschunau discussiuns, all’urna han ils da Flem lu approbau ella cun 706 euncunter 144 vuschs.

Sil medem scalem

La Finanz Infra ha, suenter quella decisiun democratica, surpriu l’infrastructura d’ennevar, ils lags artificials per l’aua d’ennevar, ils implonts d’electro ed ils pumpadis. Ussa duei la Finanz Infra SA surprender l’entira infrastructura turistica sil cuolm. Quei per in prezi da 94,5 milliuns francs. Ils referents al podi han informau surlunder. Che l’informaziun ei stada clara, transparenta e capeivla, han divers confirmau alla FMR. «Quei ei ina buna caussa che vegn a favur da nossa proxima generaziun», ha ina persuna getg. In’autra ei s’exprimida aschia: «Daco duessen nus discutar aunc pli gitg che quater jamnas quella fatschenta. Quei purtass gie nuot».

«Quei ei cun garanzia negina decisiun alla sperta», ha il president communal Christoph Schmidt sincerau. Omisduas partenarias da contract, d’ina vart las treis vischnauncas, da tschella l’Arena Alva, seigien s’entupadas sil medem scalem, ei hagi dau vivas discussiuns e mintgaton hagien las tractativas bunamein fatg naufragi. Duront l’orientaziun ha Reto Gurtner confirmau quei. Tier plirs puncts dil contract mavien las opiniuns pulitamein dapart, «igl ei stau diras contractivas, denton adina fair», ha il president dall’Arena Alva getg. Aschia eis ei stau ina dira nusch per Reto Gurtner d’integrar el contract il punct che las vischnauncas han il dretg sin in tscheins annual dad 1 % sin lur deposit da capital da totalmein 50 milliuns francs.

Evaluau tut ils scenaris

Ils referents han priu posiziun tier diversas damondas. Per exempel daco ch’ei fetschi tala prescha, ins hagi gie strusch peda da formar in meini. Norbert Good, il president communal da Falera, ha dumandau anavos a quella persuna: «Enconuscheis Vus ina fatschenta per la quala ins drova pli che sis jamnas da formar il meini e decider?» In’autra ha proponiu da spitgar cun ina decisiun tochen la fin dalla stagiun d’unviern. Ins hagi evaluau tuts scenaris, la fatschenta seigi madira e drovi buca dapli peda per discutar e reflectar, ha Adrian Wolf puntuau.

In ulteriur votant ha dumandau daco ch’il contract d’affittaziun cullas pendicularas vegni buca publicaus. «En negina firma eis ei usitau da publicar ils detagls d’in contract d’affittaziun», ha Adrian Wolf rispundiu. La suprastonza ha la cumpetenza, tenor constituziun, da stabilir il contract. Il meinaproject ha rendiu attent ch’ei detti semplamein negins crutschs zuppai en connex cun quella fatschenta. «Las contractivas ein finidas. Nus havein fatg il giudicament dallas rescas. E buca il davos sefidan las bancas da nus».

Ina persuna ha dumandau sch’ei detti ina cumissiun che controlleschi la lavur dalla Finanz Infra SA. Franz Gschwend, il president communal da Laax, ha rispundiu: «Ils specialists da finanzas controlleschan mintg’onn nus. Quels ein involvai e lur lavur sebasa sillas experientschas dils davos 20 onns culla Finanz Infra. Alla persuna che ha dumandau tgei che schabegi sch’ina vischnaunca decidi en quater jamnas encunter la fatschenta, ha il president dil cussegl d’administraziun dalla Arena Alva SA replicau: «L’Arena Alva vegn a far vinavon sco tochen dacheu.» El sefidi e seigi da buna speronza che la populaziun vesi ils avantatgs pigl avegnir che sedettien cun quella fatschenta, ton per vischnauncas e lur populaziun, la regiun e l’Arena Alva, sco era l’economia. Buca il davos rinforzi il project la collaboraziun regiunala.