Lectura rumantscha

Tge decidessas ti?

Vai er a tai uschia sco a mai? – Jau sun numnadamain vegnì in pau indifferent envers tut las istorgias da Brinzauls. Jau hai gia udì, vis, legì uschè bler ils davos mais da bovas, gallarias, «inslas» ed evacuaziuns che jau sun vegnì smuttà bravamain. Singuls rapports na legel jau gnanc pli. Ma da temp en temp ma vegni conscient tge ch’i capita gist en quel vitg. Ier mardi, ils 30 da settember 2025, è numnadamain stà il di che abitantas ed abitants han stuì decider, sch’els vulessan bandunar per adina lur dachasa ed ir definitivamain a viver en in auter lieu – u sch’els vulessan tuttina anc spetgar e sperar che tut vegnia bun. Co decidessas ti? La reportascha dals collegas da l’agentura Keystone-SDA raquinta dal dilemma da Brinzauls.

Ed anc ina decisiun

E co decidessas ti, sche ti fissas in’abitanta da Flem, Laax u Falera? – Quellas trais vischnancas decidan gea la fin d’october, sch’i vulan cofinanziar la cumpra da l’infrastructura da las pendicularas Arena Alva. Glindesdi saira è stada a Flem in’infurmaziun per la populaziun. Il tenor general va en favur dad ina cumpra.  

La generaziun da la midada radicala

Mintga giada che jau discur cun ina persuna dal Grischun ch’ha oz tranter 80 e 90 onns, ma vegni conscient: Tge midadas enormas che quellas persunas han fatg tras! Dad uffant stuevan ellas anc ir a bigl a lavar la vestgadira – ed oz ston quellas persunas savair trametter fotografias cun il telefonin. Probabel n’hai mai dà en l’istorgia umana ina generaziun ch’ha vivì ina tala midada radicala. Ina da quellas persunas è Ulrica Guidon da Zernez. A nossa collega da la ­Posta Ladina, Fadrina ­Hofmann, ha ella raquintà da sia vita da prest nov decennis. Igl è bler.

Buna Lectura Rumantscha cun decisiuns sur generaziuns!