Vella daventa il center dal chant rumantsch

Per la terza giada envida l’Uniun chanzun rumantscha a ses festival che celebrescha il chant e la chanzun rumantscha. Suenter Trun (emprim festival il 2019) e Zuoz (2022) vegn organisà l’inscunter questa giada  a Vella en Val Lumnezia.

Per questa ediziun han 21 cumponists e sis cumponistas inoltrà lur novas chanzuns che van en concurrenza. Sper las categorias d’enfin ussa – chor d’uffants, chor maschadà e chor viril – datti da nov er ina categoria per chor da dunnas.

In program multifar

La concurrenza da novas chanzuns è il punct da program central dal festival. Avant e suenter datti dentant divers concerts cun bler chant en pliras furmaziuns. Il venderdi saira preschentan scolaras e scolars da la 5avla e 6avla classa da Castrisch, Duin, Glion, Lumnezia, Rueun e Ruschein otg chanzuns cun lur texts. L’enconuschenta band Silberbüx ha mess quests texts en musica. Pli tard il venderdi saira dattan Martina Linn e Mattiu in concert en la halla polivalenta a Vella. Sco prebands sunan duas furmaziuns da giuvenils, ils Skyline Walkers e K!ss Me.

In voting sin distanza

Sonda avantmezdi suonda lura in chant avert per famiglias ed il suentermezdi datti la concurrenza da novas chanzuns che porscha quest onn gist duas innovaziuns: In chor ad hoc preschenta las novas chanzuns – tant quellas per chor viril, sco era per chor maschadà e da chor da dunnas. Las novas chanzuns per chors d’uffants vegnan preschentadas dal chor d’uffants da Sumvitg ensemen cun la scola da chant da la Scola da musica Surselva.

La segunda innovaziun a Vella – sper il chor ad hoc – è il voting per tuttas e tuts sin distanza. RTR emetta numnadamain in livestream da la concurrenza da chant sin rtr.ch e PlayRTR. Plinavant vegn la concurrenza er emessa direct en il radio. Uschia pon era persunas che n’èn betg da la partida a Vella tadlar ed eleger lur chanzun favurita. Suenter il voting vegnan premiadas las chanzuns victuras da mintga categoria e surdads ils premis per las cumponistas ed ils cumponists victurs.

Las chanzuns victuras sco era tuttas chanzuns novas stattan silsuenter a disposiziun a tuttas e tuts via la pagina d’internet da l’Uniun chanzun rumantscha. Là pon ins guardar las chanzuns e sch’ina dirigenta u in dirigent vul la chanzun per ses chor, lura po el u ella dumandar il dretg da la cumponista u dal cumponist. Fin uss eran las novas chanzuns per il festival mintgamai a disposiziun per il temp fin al proxim festival. Ussa vuless l’Uniun chanzun rumantscha publitgar e metter a disposiziun tuttas 132 chanzuns ch’igl ha dà fin uss als trais differents festivals a Trun, Zuoz e Vella.

Instrumental e sacral

La sonda saira – suenter tut la concurrenza da cumposiziuns – envida lura la Musica giuvenila Surselva a concert. Ensemen cun il chantadur Dario Hess preschentan els arranschaments da sias chanzuns.

La dumengia stat lura la chanzun sacrala en il center dal festival. Iso Albin vegn a referir davart la «Consolaziun de l’olma devoziusa». Quest cudesch da chanzuns sacralas è stà en diever durant passa 250 onns en la liturgia catolica da la Surselva ed è vegnì publitgà en 12 ediziuns.

Il terz Festival da la chanzun rumantscha vegn arrundà a Vella cun in concert en la baselgia da Pleif, Vella. L’ensemble Schweizer Vokalconsort, dirigì da Marco Amherd, vegn ad interpretar melodias da la Consolaziun e preschentar ulteriuras ovras.

Sper las preschentaziuns e concerts a Vella datti durant il festival er anc in’exposiziun a Lumbrein. Sut il titel «Resonanza» ha la Fundaziun da cultura Lumnezia realisà in’exposiziun tematica deditgada al svilup dal chant rumantsch. Ella sa chatta en la Casa d’Angel a Lumbrein e porscha impressiuns auditivas, visualas e sensitivas da la multifara cultura musicala rumantscha. Persunas interessadas pon visitar l’exposiziun da gievgia fin dumengia mintgamai il suentermezdi. L’exposiziun resta averta era suenter il Festival da la chanzun rumantscha, fin ils 10 da schaner 2026.