Midadas tar il program da radio

Cun l’entschatta d’october 2025 datti tar il program da radio da Radiotelevisiun Svizra Rumantscha (RTR) intginas adattaziuns, sco che la chasa da medias ha infurmà quests dis sin ses chanals digitals. Las midadas las pli impurtantas en survista, tenor las indicaziuns dad RTR:

«Magazin» sa numna ina nova emissiun d’infurmaziun da mezdi e da saira che vegn emessa mintgadi a las 12.00 ed a las 17.00. L’idea saja da furnir en quella emissiun las pli impurtantas novitads, reportaschas, intervistas ed analisas. Il format duai esser «cumpact cun focus regiunal» ed era star a disposiziun sco podcast.

L’emissiun da profundaziun «Marella» vegn emessa da nov la sonda a las 11.00 – enstagl da dumengia a las 09.00.

L’emissiun populara da las «Gratulaziuns» entschaiva da nov ina mes’ura pli baud, damai gia a las 12.30. Per la paja croda a quel urari il «Rendez-vous am Mittag» – in’emissiun en lingua tudestga che RTR emetteva parallel cun SRF.

Il «Kikeri6», il gieu radiofonic da la damaun enturn las 07.40, datti mo pli da glindesdi fin venderdi. La sonda vegn el remplazzà mintgamai tras il «Kikeri Kids», dentant ina buna mes’ura pli tard, a las 08.18. Il gieu vul s’adressar als uffants en la vegliadetgna da 5 fin 12 onns.

Il «Artg musical» è d’udir da nov la dumengia damaun a las 09.00. RTR vuless realisar quella emissiun musicala en furma pli discursiva cun giasts.

Ina giada al mais vul RTR emetter durant in’ura live da Berna da la Chasa federala. L’emissiun «Café federal» – ussa pia en lingia directa – porscha ina survista dals fatgs actuals da politica federala ed metta a lieu ils svilups ils pli impurtants. En il focus stattan era temas socials e culturals da las autras regiuns linguisticas da la Svizra. L’emprima emissiun ha lieu ils 23 d’october.

Tge croda davent?

En il rom da questas restructuraziuns vegnan dentant era stritgads u remplazzads intgins elements da radio. Uschia crodan las emissiuns «Stailalva» e «La populara». Era stritgada vegn l’ura dals «Semperverds» (oz tranter las 16.00 ​– 17.00). Quella musica specifica – per uschè dir evergreens dal rock e pop – vegnia dentant era vinavant ad esser d’udir en il program da musica quotidian, sco che RTR fa a savair.

Medemamain croda durant la damaun – en il program da mintgadi – la co-moderaziun. En l’avegnir maina ina moderatura u in moderatur sulet/ta tras l’emissiun da la damaun, damai senza in’assistenza. Tenor RTR èsi la finamira da dar uschia «dapli profil a la moderaziun».