Lectura Rumantscha

Il pled transfurmaziun è actualmain fitg popular. Betg mo la digitalisaziun è in chavazzin en quest connex, mabain era las tematicas da la Lectura Rumantscha dad oz.

Dal nair a l’alv

Christian Laesser è professer d’economia cun focus turissem a l’universitad da Son Gagl. El valitescha la cumpra da l’infrastructura da l’Arena Alva tras las vischnancas Flem, Laax e Falera positivamain. Ils ristgs sajan limitads, sco ch’el di. Ins pudess dir ch’el na vesa betg nair per ­l’Arena Alva.

Da la rasulauna a la tgiralla

100 000 francs han ils organisaturs investì en la tecnica e l’infrastructura dal musical Plaun Salter. Quai è ina pulita summa. Betg da smirvegliar che la halla polivalenta a Danis ha fatg ina bella metamorfosa e daventà in ­veritabel teater da musical cun in palc ed ina tribuna ­professiunala.

Dal contra al pro

L’emna passada è in adversari dal sviament da Sta. Maria vegnì a pled en La Quotidiana, quest’emna ils aderents. «Audiatur et altera pars», sco ch’ils Romans schevan. Era tschella vart duai vegnida tadlada. I vegn dentant probablamain anc a dar bleras varts che vulan vegnir tadladas en connex cun quel sviament.

Dal guaud a la pastgira

Ina muntanera da chauras fa actualmain ina buna lavur a Schluein e Sagogn. Quellas chauras nomadas, a posta vegnidas transportadas en la Foppa, maglian là lur spaisa preferida, chaglias, e procuran uschia che in quasi guaud daventan puspè pastgira.

A revair e bun divertiment cun la Lectura Rumantscha!