Pign e grond ha gudiu e festivau la canzun

Suenter ch’il Festival da la chanzun rumantscha ei vegnius arranschaus 2019 a Trun e 2022 a Zuoz eis el staus sin viseta la davosa fin d’jamna a Vella. En ed el contuorn dalla halla plurivalenta ha l’Uniun La chanzun rumantscha arranschau il festival en stretga collaboraziun cun in comite local cun persunas indigenas: Clau Scherrer, Giusep Giuanin Decurtins, Flavia Walder ed Iris Cadalbert davart l’uniun; Silvana Caviezel, Alexi Nay, Remo Derungs, Gabriel Sgier e Martin Cabalzar han formau il comite local. Il program ch’els han purschiu ei staus varionts. El ei staus in spieghel dil vast spectrum actual da musica e cant romontsch. Pign e grond, giuven e vegl ha anflau quei ch’el ha vuliu. «Varga 2000 persunas han visitau ils arranschaments el liug ni persequitau els via livestream sin Radio Televisiun Rumantscha», scrivan ils organisaturs en ina communicaziun als mieds da massa.

In success cumplein

«Il tierz Festival da la chanzun rumantscha ei staus in success cumplein. Ton la concurrenza da cumposiziuns sco il vast program accumpignont cun concerts da differentas formaziuns, cant aviert, intermezzos e referats han documentau ch’il chant romontsch viva ed ei fetg innovativs», scriva il plidader da medias dil festival, Martin Cabalzar ella communicaziun per la fin dils treis dis da cant, musica, sentupada e divertiment a Vella. Fetg cuntents cugl andament ed igl interess dil publicum ei era il president dall’Uniun La chanzun rumantscha, Clau Scherrer (mira intervista).

45 cumposiziuns

Il punct culminont dil festival ei la concurrenza da cumposiziuns stada. Per quella havevan sis cumponistas e 21 cumponists inoltrau 45 cumposiziuns. En vesta al festival ein quellas vegnidas giudicadas dalla giuria cun Lea Scherer, Lisa Appenzeller e Martin Zimmermann. Las cumponistas ed ils cumponists derivan dalla Romontschia, sco era dalla Svizra tudestga e franzosa e schizun digl exteriur. Dil reminent: Dallas 45 cumposiziuns sebasan buca meins che 20 sin texts d’Arnold Spescha. La giuria ha fatg ina schelta e selecziunau mintgamai treis cantuns per mintgina dallas quater categorias: chor d’affons, chor da dunnas, chor mischedau e chor viril. Las 12 cumposiziuns ein vegnidas interpretadas dil chor dil festival e presentadas la sonda suentermiezdi ella halla plurivalenta a Vella sut la direcziun da Clau Scherrer, Flavia Walder e Rilana Cadruvi Scherrer. Radio Televisiun Rumantscha ha emess directamein las presentaziuns, aschia che tuttas e tuts buca presents en halla han saviu persequitar la concurrenza da casa anora. Ils presents ed in e scadin a casa ha allura giu la pusseivladad da dar lur vuschs a lur canzuns favoritas. La sonda encunter sera han ils organisaturs allura communicau ils victurs, seigi quels dalla giuria sco dil pubicum (mira box). Las cumposiziuns inoltradas pil festival vegnan dil reminent publicadas tuttas silla pagina d’internet chanzunrumantscha.ch e stattan a disposiziun gratuitamein als chors.

Cumponiu, referiu e cantau

Il festival ha entschiet il venderdis sera cun producziuns dalla tschunavla e sisavla classa da Castrisch, Duin, Glion, Lumnezia, Rueun e Ruschein. Sut la direcziun da Flavia Walder ed Iris Cadalbert ha il chor presentau cumposiziuns cun agens texts. Avon che Mattiu e Martina Linn sepresentien alla tribuna han ils organisaturs dau la caschun als victurs dil Premi Lions 2025 Skyline Walkers e Kiss Me da sepresentar al publicum. L’emprema purschida dalla sonda ei allura stada ell’enzenna dil cant aviert per famiglias cun Flavia Walder ed Ursin Camenisch. «Quei workshop ei staus frequentaus fetg bein, schizun tattas e tats ein separticipai cun lur biadias e biadis», di Martin Cabalzar.

La canzun dil festival

Per ina supresa ha il musicist Ruedi Lutz procurau. El ha scret a cuort termin ina «Chanzun dal festival» e ha impovisau al clavazin intermezzos da quater canzuns popularas cantadas spontanamein dil publicum en sala la sonda suentermiezdi. Sco Ruedi Lutz ha tradiu sin tribuna, ei la canzun da festival ina da varga 100 da sias cumposiziuns dils davos onns. Il text per sia canzun dil festival «Gis da maina murir» ei ord la plema da Claudio Spescha. La sonda sera ei stada dedicada al concert da gala dalla Musica giuvenila Surselva e Dario Hess. Il dirigent Remo Derungs ha integrau sias novas cumposiziuns e ses novs arranschaments en quei concert. La finiziun dil festival ei vegnida fatga la dumengia d’Iso Albin cun in referat davart la collecziun da canzuns sacralas «Consolaziun dell’olma devoziusa» e digl ensemble professiunal «Vokalkonsort» en l’anteriura baselgia da vallada a Pleif.