Exercitau, perscrutau ed interpretau
Dudischs scolaras e scolars dalla tschunavla classa dil gimnasi dalla claustra da Mustér han fatg musica cun Pascal Gamboni l’jamna vargada. Suenter haver exercitau ed interpretau las canzuns dil musicist tuatschin ei la gruppa sepresentada al publicum. Il project ch’ei vegnius numnaus «Live» ei staus en rama dall’jamna da focus dil gimnasi.
Dallas dudisch scolaras e scolars dalla tschunavla classa dil gimnasi dalla claustra da Mustér ch’ein separticipai all’jamna da focus cun musica e cant sunan bunamein tuts in instrument. «Quei ha secapescha levgiau la lavur da quell’jamna. Aschia hai jeu buca stuiu svegliar igl interess per far musica. Nus havein saviu ir spert vid la caussa», di il musicist Pascal Gamboni. Per el ei la lavur sur plirs dis cun ina classa stada ina nov’experientscha: «Mezs dis hai jeu era gia collaborau denter auter cun classas primaras, mo quei cheu ei veramein stau enzatgei niev. Ei ha fatg plascher.» L’jamna da focus cun musica e cant ei vegnida intitulada «Live». La dirigenta dil chor claustral, Rilana Cadruvi Scherrer, relata daco: «Nus havein vuliu sapientivamein che las scolaras ed ils scolars fetschien quella ga musica el senn dil plaid. Ils pli biars sunan gie in instrument, aschia che la caschun era dada. Tenor miu manegiar ei quell’jamna reussida fetg bein en collaboraziun cun Pascal Gamboni.»
«Nuot ei scret en crap»
Exercitau, perscrutau ed interpretau han las scolaras ed ils scolars l’jamna passada canzuns da Pascal Gamboni. Ses tocs ein vegni interpretai per part da niev cun in tschuppel instruments sco percussiun, violina ni clarinetta. «Igl ei stau interessant d’integrar novs instruments en mias canzuns, surtut da mirar tgei che va bein aprau nua. Aschia ein sedadas cumbinaziuns veramein specialas. Tier la musica ei nuot scret en crap, ei dat adina pusseivladads da variar», di il musicist dalla gruppa dils Passiunai e constatescha: «En quei senn ei quell’jamna da focus da musica unica. En quella cumposiziun dat ei quei mo ina ga. Veramein special eis ei era che nus havein saviu terminar quels dis communabels cun in concert public. Quei concert ei la fin finala staus la finamira da tuttas e tuts duront l’jamna.» Scolaras e scolars hagien giu gust da quell’jamna, mussond interess e havend pazienzia da collaborar. El savessi s’imaginar da repeter ina tal’jamna da focus.
«Quei fa plascher»
«A mi ha ei plaschiu fetg bein da far musica cun Pascal Gamboni. Tgi ha sunau e tgi ha cantau», di la studenta Anja-Timea Arpagaus (18) da Sagogn che suna violina dapi quater onns. Ella hagi appreziau zun fetg da saver luvrar spirontamein vid tocs cun cant romontsch. Ina nov’experientscha ei quell’jamna cun musica e cant era stada per Jannis Lutz (17) da Mustér. «Jeu havevel in temps buca pli sunau s-bass (tuba). Quei ei stau la caschun d’entscheiver puspei.» Schebein il fiug da cuntinuar culla musica seigi s’inflammaus danovamein ha el buca saviu dir. «Il special vid quell’jamna ei stau da saver luvrar cun nos instruments vid ils tocs da Pascal Gamboni ch’jeu hai tedlau savens. El sez ei fetg simpatics, lucs ed aviarts», di Jannis Lutz.
Duas ga per onn
Il gimnasi dalla claustra da Mustér porscha jamnas da focus mintgamai igl atun e la primavera. En quellas jamnas duein las scolaras ed ils scolars sefocusar sin in tema special. L’jamna da focus da quest atun ha giu liug dils 29 da settember entochen ils 3 d’october. L’emprema classa ei sefatschentada dil tema «Ad fontes» (allas fontaunas), la secunda al film e la foto e la tiarza ei seprofundada en romontsch, tudestg e teater. Etica e religiun ei stau il tema dalla quarta classa gimnasiala. La tschunavla classa ha tematisau la musica e la sisavla ei stada sin viadi da cultura ella Romandia, respectivamein l’Italia. L’jamna da focus da primavera proxima ei fixada sils 30 d’avrel entochen ils 3 da matg.
Gust da leger dapli?