Forum medelina 2025 ell’enzenna dil turissem en muntogna

L’uniun da cultura Uniun medelina envida era uonn ad in forum cun persunas che s’engaschan per la muntogna. Sco l’uniun scriva en ina communicaziun als mieds da massa stattan la cultura ed il turissem el vitg da muntogna el focus. L’entschatta dil Forum medelina che ha liug sonda, ils 25 d’october 2025 vegn fatga dallas auturas Flurina Badel e Lea Catrina. Omisduas han scret in roman davart la munconza da spazi da viver, overtourism e las sfendaglias denter las classas el Grischun. Silsuenter vegnan ellas ad approfundar il tema communablamein cun Albert Lutz (president dall’Uniun La Vitrina), Christof Steiner (meinafatschenta dalla Casa da cura Bravuogn) e Kaspar Howald (meinafatschenta da Grischun cultura).

Hotels da cultura el Grischun

Cun occasiun da quei forum vegn era l’iniziativa «Hotels da cultura Grischun» lantschada. Sin iniziativa da Grischun cultura ein ils hotels Medelina a Curaglia, Casa da cura Bravuogn e Casa da cultura Pontisella Stampa en Bregaglia s’uni ad ina cuminonza d’interess. «Cun quei project lein nus accentuar il profil dils hotels da cultura ed aschia rinforzar lur posiziun anoviars», di Kaspar Howald. La finamira dil project ei da formar ina reit da hotels da cultura che colligia tuttas regiuns el cantun ed enrihescha aschia la dimora da hosps interessai vid la cultura.

Sonda, ils 25 d’october 2025. Entschatta allas 16.00 el hotel Medelina a Curaglia. Guidada en La Vitrina: Allas 15.00 ha liug in apero da beinvegni ella stalla d’exposiziun La Vitrina a Curaglia cun siu iniziant Albert Lutz. Per finir vegn dau la pusseivladad allas 19.00 da tschenar el hotel Medelina (preannunzia necessaria). info@medelina.ch