Ün partenedi da ballapè cul maister da record

Sper l’educaziun academica giouvan già daspö la fundaziun dal Lyceum Alpinum a Zuoz l’an 1904 diversas sorts da sport üna granda rolla i’l minchadi da las scolaras e dals scolars. Que conferma eir il motto da la scoula media zuozingra, nempe «Mens sana in corpore sano» – dimena ün spiert saun in ün corp saun. Quist motto vain eir vivieu minch’an in occasiun dal Champs da sted internaziunels, chi’d haun adüna lö düraunt quatter eivnas da sted cur cha’ls scolars e las scolaras da la scoula media sun in vacanzas.

Per quists champs vaiva il Lyceum Alpinum già daspö divers ans adüna ün partenari da ballapè e l’ultim da quels d’eira l’AC Milan. «Quista collavuraziun es però adüna gnida rimplazzeda d’üna agentura, chi’d ho bainschi pudieu fer adöver dal nom da l’AC Milan, ma a la fin nu d’eiran cò treneders dal club», disch Martin Scherer, mneder finanzas e servezzans tal Lyceum Alpinum. El agiundscha cha que nun hegia a la fin propi mê gieu üna colliaziun directa traunter la societed da ballapè da la Lombardia e’l Lyceum Alpinum. Perque es la scoula media ida in tschercha d’ün nouv partenari – ed al ho uossa eir chatto in Germania.

Prüm partenari in Svizra

Daspö quist avuost es il Lyceum Alpinum nempe «Youth Football Partner» – dimena partenari da ballapè per la giuventüna – dal FC Bayern München. Tar la scoula media da Zuoz as tratta que da la prüma scoula in tuot la Svizra cun ün partenadi cul FC Bayern München. Ma perche uossa precis quista collavuraziun cul club tudas-ch e che maina que a la scoula?

«In prüma lingia per spordscher üna buna qualited i’l sport e bunas scolaziuns per noss scolars – ma eir pels magisters e las magistras da sport. Impü es il territori da la Germania dal Süd tradiziunelmaing ün marcho fich important per nus e da pudair collavurer cul maister da record tudas-ch es per nus üna grand’onur ed ho ün grand effet», declera Martin Scherer. El agiundscha cha quista partenedi saja fabricho sü sün duos püttas, nempe cun ün prüm focus süls Champs da sted internaziunels – düraunt ils quels ils coaches dal FC Bayern München mainan ils trenamaints da ballapè – e cun ün seguond focus sül minchadi scolastic da sport. Perque vegnan da nouv eir scolos ils treneders e las trenedras da la squedra da ballapè dal Lyceum Alpinum dals profis a München.

Visitas a München e viceversa

Impü haun las scolaras e’ls scolars dal Lyceum Alpinum l’occasiun dad ir duos voutas l’an per ün pêr dis a München. Suot il nom «Munich Experience» paun els trener sül campus o sün l’areal da trenamaint dal club tudas-ch. Quist dis a München spordschan a las scolaras e scolars impü eir guidas tres il stadion, gös d’amicizcha scu eir visitas da gös da la Bundesliga. «Quista spüerta dess promouver la tecnica, il cumport da team, ma eir la respunsabilited sün e sper la plazza da ballapè e que cun sustegn da profis», disch Martin Scherer.

In ün seguond pass es que però eir previs cha persunas da München vegnan a Zuoz. Que es impustüt previs per partecipants da la «Global Academy» dal FC Bayern München. Quella academia promouva giuvens talents da tuot il muond ed als trenescha per ün temp limito a München. In quist’occasiun dessan quists giuvens talents da ballapè eir river a Zuoz per absolver ün program da sport e speratiers eir auncha profiter d’üna scolaziun academica. Uscheja esa eir planiso cha magister e magistras dal Lyceum stessan a disposiziun a la Global Academy per la scolaziun academica dals talents e que u bain cun scolaziun online u alura cun programs academics a München.

«Impü essans pel mumaint eir in ün scambi luoch cul CB Schlarigna per guarder scha que’s pudess druver sinergias e spordscher al club ün trenamaint u scolaziun in collavuraziun cul FC Bayern München – ed uscheja eir auncha der inavous qualchosa a la regiun cun quist partenedi», declera Martin Scherer.