«Parcella da muntada strategica»
La vischnaunca da Mustér ei sil precint d’acquistar la proprietad dalla famiglia Couchepin-Hess a Mustér. La part essenziala da quella ei la parcella Hess amiez il vitg. Ella ha ina grondezia da 3000 meters quadrats e sin ella sesanfla ina dallas pli imposantas e dominontas casas el vitg. Treis milliuns francs duein vegnir sbursai per la proprietad.
Dapi biars onns ein las autoritads communalas da Mustér en contact culla famiglia Couchepin pertuccont ina cumpra dalla gronda parcella amiez il vitg. Gia avon 20 onns ein discuors cun ella vegni menai. En quei temps ei la parcella culla casa imposanta era stada venala. Ussa presenta la suprastonza communala ina proposta per la cumpra digl entir possess a Mustér dalla famiglia Couchepin-Hess. Ei setracta dalla parcella amiez il vitg sco era da praus ed uaul.
Gievgia, ils 23 d’october sefatschenta il cussegl da vischnaunca dil credit da treis milliuns francs e dumengia, ils 30 da november 2025 duei il pievel decider davart la cumpra. Denteren, venderdis, ils 31 d’october 2025, preveda la suprastonza communala d’orientar la populaziun davart il project.
Per treis milliuns francs
Il possess dalla famiglia Couchepin-Hess cumpeglia in tschuppel parcellas. La principala ei quella amiez il vitg cull’imposanta casa da crap. Leutier vegn in baghetg d’economia a Plaun da Heida, in ualer sco era terren enteifer ed ordeifer igl intschess dalla meglieraziun funsila ed ina parcella cun uaul. Tut en tut setracta ei d’ina surfatscha da dapli che 100 000 meters quadrats, respectiv diesch hectaras. «La valeta da schischom da quellas parcellas importa 2,58 milliuns francs. Per la suprastonza communala ei quella fatschenta da muntada strategica e centrala pil futur dalla vischnaunca. Tonpli ch’ins spetga dapi decennis ina pusseivladad da meglierar la situaziun amiez il vitg», scriva la suprastonza communala el messadi per mauns dalla seduta dil cussegl da vischnaunca. Per quei motiv seigi in prezi pauschal da treis milliuns francs giustificaus. «Ei setracta d’ina investiziun persistenta en fuorma da facultad finanziala che piarda buca valeta. Per la suprastonza communala ei quella summa giustificada e conforma alla valeta commerciala», scriva la suprastonza communala.
Negins projects concrets
Tgei che duei succeder culla parcella e la casa amiez il vitg ei buca decidiu. «En emprema lingia ha ei num segirar il possess per saver sviluppar vinavon la vischnaunca.» Quei ha il president communal, René Epp, detg sin damonda dalla FMR. Sco ins sa leger el messadi per mauns dil cussegl da vischnaunca dat ei negins projects concrets per la casa ed il curtgin spazius. 2026 duei vegnir instradada ina publicaziun ufficiala per ina concurrenza culla finamira d’anflar investurs e sviluppaders da project che realiseschan in concept da construcziun adattau. «Per quei intent vegn definiu finamiras e fixau entginas cundiziuns da basa. Il terren duei vegnir mess a disposiziun en dretg da baghegiar», scriva la suprastonza communala.
El messadi scriva ella denton era: «Igl acquist dalla parcella amiez il vitg dess la pusseivladad da sviluppar il center dil vitg ad in liug attractiv.» Sco René Epp di, fa la famiglia Couchepin-Hess era neginas pretensiuns tgei che ha da succeder cun casa ni curtgin. Tenor l’executiva duei il terren agricol esser els mauns dalla meglieraziun funsila. Lezza sappi far diever da quei terren per cumpensar sperditas da terren en connex cull’infrastructura dalla meglieraziun funsila ni per cumpensar sperditas da terren agricol che po vegnir nezegiaus sco terren da baghegiar.
Treis onns vid contrahar
Las contractivas per la soluziun ch’ei ussa sin meisa pertuccont la proprietad dalla famiglia Couchepin-Hess han entschiet avon treis onns. «La famiglia ha exprimiu lu il giavisch d’ina soluziun cumplessiva per siu possess. Il settember 2022 ha la suprastonza communala allura suttamess in’offerta persuenter», scriva la suprastonza communala el messadi. Suenter ulteriuras contractivas ed il schazetg dils baghetgs entras igl uffeci per la valetaziun d’immobilias, ei suandada in’ulteriura offerta dalla vischnaunca l’entschatta mars 2025. Silsuenter ei il contract da cumpra vegnius preparaus aschia ch’ils gremis politics san prender ussa las decisiuns. Aschilunsch ch’il cussegl da vischnaunca accepta la proposta, vegn ella suttamessa al pievel.
Commentari
Ina schanza unica
Hans Huonder/FMR
La vischnaunca da Mustér ha la caschun da cumprar il possess dalla famiglia Couchepin-Hess a Mustér. La part principala da quella ei la parcella amiez il vitg. Ella sesanfla alla cruschada dalla Via Sursilvana ed ils Pass Lucmagn ed Alpsu. Leu era il coc dil vitg pli baul – la veta e truscha commerciala. Cul traffic motorisau ei quei semidau. Oz eis ei plitost in liug da transit. Ina ga ni l’autra schizun era cun colonnas d’autos.
La caschun da cumprar quella parcella ei unica. Schar mitschar quella fuss probabel fatg puccau. E tuttina: Il mument ch’autras grondas investiziuns ein sin rucca a Mustér sco per exempel ella serenera ni ella casa da scola, ein treis milliuns francs buca ina cagna. La cumpra ei ina vart dalla medaglia, l’autra ein ils cuosts suandonts cun ni senza investurs.
La cumpra astga buca sebasar spirontamein sil giavisch da vegnir en possess da quella parcella cun sia casa dominonta el vitg. Ei drova bunas ideas co nezegiar quella parcella e surtut era la casa. En quei process sto il pievel vegnir involvius. Quei duess esser part dil messadi da votaziun. Quella parcella astga buca survir ad interess particulars. L’idea d’ina concurrenza per investurs ei da beneventar senza denton negligir il meini dil singul vischin che passa quei liug di per di e che s’identifichescha cun quel.
Leu – en quella casa cun localitads spaziusas – havess Mustér per exempel l’unica caschun da realisar finalmein in project en favur da sia cultura. Per ualti bein tut ha la vischnaunca giu in’ureglia aviarta ils davos onns (sport, turissem, temps liber, casa da tgira, meglieraziun, vias), mo buca per sia historia e sias atgnadads. Neras uras pia da dar spazi en quei baghetg alla historia dalla vischnaunca.
Gust da leger dapli?