Ina gronda sperta

En Surselva datti dabia: Vaccas cun persunalitad, persunas cun tenuta e meisas rodundas cun olma. En in temps el qual la frestgera di a nus cu il latg ei alla fin, resta la meisa rodunda in liug analog. Negin filter, negin algoritmus. Sulettamein glieud, opiniuns e mintgaton in’egliada memia profunda el migiel.

Igl ei buca mo ina sempla pusseivladad da seser. Igl ei in biotop. Cheu prospereschan teorias che selaian buca cumprovar, buca defender, mo che constattan zaco tuttina. Cheu sedecida tgi ch’ei la cuolpa, sche la neiv ei memia bletscha, la stad memia schetga ni la ­societad da musica memia moderna.

La dinamica dil discuors ei unica. Strusch vid meisa e gia audan ins: «Aschia buc!» – E schon ein ins amiez ils fatgs dil mund, las elecziuns communalas ed ils scandals dils vischins. Savida dil fatg ei opziunal, in meini obligaziun. Ei vegn fatg sgnoccas, sescagnau, sevilau – mo buca purtau suenter. Priu il cass ch’enzatgi va tuttina offendius ord l’ustria, lu – gie lu – vesan ins tala persuna per in temps buca pli.

La meisa rodunda ei in tractament a basa naturala. Ins vegn cun quitaus dil mintgadi, va cun novs – mo silmeins partan ins els. Igl ei ina terapia da gruppa, in spazi per sgiavlar e lahergnar. Cuort: La megliera app per communicar – mo halt cun carn e saung.

Lu datti entgins classichers sco l’empustaziun: «Oscha, dai ina gronda sperta.» Tgi che capescha quei falliu ei forsa propi aunc mai staus vid ina meisa rodunda. Ina «gronda sperta» ei ina gervosa – secapescha. La bubronda che stizza la seit en in tempo da record e che fa beinvegni alla sera sontga.

Tgi di che la meisa rodunda hagi grev egl avegnir. Mo la medema glieud di era che La Quotidiana vegni gleiti buca pli stampada e ch’il romontsch mieri. La meisa rodunda viva. Forsa buca pli en mintg’ustria, mo leu nua ch’ella ei aunc, leu eis ella ferma. Ed aschi ditg ch’ella exista, datti speronza: Sin discuors autentics, in esser libers ed in realisar che la veta anfla savens siu senn leu, nua ch’ei vegn viviu communablamein. Davos meisa. Cun ni senza cruna da spema.

Patricia Tschuor-Marques abitescha a Rueun. Ella sesa gugent davos ­maisa cun persunas autenticas ed ina gervosa fraida.