Lectura Rumantscha

Oz datti da leger per tai istorgias or da vitgs e val. Per ina giada prendain nus propi serius il pled «vitg». I va oz per plirs vitgs.

Trin, Filisur e Sta. Maria

Ta regordas ti forsa anc cura che tut il traffic da transit gieva tras Trin? U ta regordas ti forsa anc da las streglias stretgas tras Filisur? – En il fratemp han quels dus vitgs in sviament. E tuts dus vitgs èn sa sviluppads considerablamain: Il minz da Filisur è daventà in bischu cun bellas chasas en stil engiadinais. Ed a Trin crescha la populaziun ad in crescher. Ma tge avegnir spetga al vitg da Sta. Maria en Val Müstair in bel di, suenter la construcziun dal sviament? – Precis quai ha la populaziun empruvà da discutar questa sonda passada.

Schlans e Sedrun

Tge diavel han Schlans e Sedrun da far in cun l’auter, quai ta dumondas ti forsa? Probabel han er in pèr utschels da la notg pensà il medem questa fin d’emna ed han barattà las tavlas dals dus vitgs sursilvans, uschia che Schlans era tuttenina Sedrun – e cuntrari! Tgi ch’ha fatg la «cattavegna», quai n’ha la redacziun da la FMR betg pudì eruir. Ma il president communal da Trun (e da la fracziun da Schlans), Dumeni Tomaschett, ha manegià cun in surrir: «Nus essan aviarts per novas fusiuns!»

Domat e Cuira

Per Domat, in vitg ch’è losch da sia ierta rumantscha, èsi stà questa primavaira ina detga schleppa. Passa 30 onns era Domat il dachasa dals «Dis da litteratura» (DDL), fin che l’uniun purtadra ha decis da far midada vers Cuira. Questa fin d’emna èn ils DDL a Cuira, dentant senza sustegn finanzial da Domat.