Buca tuts san duvrar la cabina da Signina

«La pendiculara cun ina distanza da 750 meters da Riein vi Signina ei vegnida construida ils onns suenter 1970 enstagl d’ina via da meglieraziun denter Riein e Signina», di il president communal da Ilanz/Glion Marcus Beer alla damonda dalla FMR daco ch’ei detti atgnamein negina via da colligiaziun che meini da Riein a Signina. «El rom dalla meglieraziun funsila da Riein han ins construiu la pendiculara sco cumpensaziun per ina via da meglieraziun. Perquei ha il cantun Grischun finanziau da lezzas uras ina gronda part da quella pendiculara.»

Negins tranports da turists

Il diever dalla pendiculara da Riein a Signina ei reglaus.«Ella lubientscha da menaschi ch’il cantun Grischun ha renovau igl onn 2017 eis ei determinau claramein tgi che astga far diever da quella pendiculara», di il president communal da Ilanz/Glion. Quei seigien ils habitonts da Signina e lur visetas, ils proprietaris da casas e baghetgs da vacanzas a Signina, ils purs che cultiveschien suloms a Signina e las persunas dil menaschi forestal. La lubientscha hagien era persunas responsablas pil manteniment dall’infrastructura egl uclaun al pei dil Péz Fess. E secapescha che la pendiculara – che dispona d’ina barella – seigi era accessibla pil transport da biestga e da material. Sclausas dalla concessiun ein tenor Marcus Beer denton intents commercials, pia per exempel era transports da turistas e turists.

Negin mied da transport public

Entochen avon entgins onns era il  menaschi dalla pendiculara da Riein-Pardi a Signina survigilaus da Peter e Hedy Derungs da Signina. Entochen ch’els ein stai responsabels per la pendiculara, astgavan era turistas e turists far diever da la pendiculara cun telefonar als survigiladers e dumandar per la lubientscha d’ir culla cabina sur la val vi. La famiglia Derungs ha denton dau giu las clavs suenter 30 onns per motivs da vegliadetgna. Ed els ein oz ils davos dus habitonts stabels da Signina. Con gitg che Hedy e Peter Derungs  habiteschan aunc leu, han els buca saviu dir enviers la FMR. Suenter els ha denton negin supriu la gestiun dalla pendiculara pli.

Investiziuns indispensablas

«Per in diever ordeifer las categorias da persunas stipuladas ella lubientscha da menaschi, stuess ins exnum haver ina persuna da gestiun ed ins stuess far lavurs da renovaziun vid la pendiculara», declara Thomas Tanner, il menader dil survetsch da pendicularas egl Uffeci d’agricultura e da geoinformaziun dil Grischun. «La pendiculara da Signina corrispunda buca pli al level tecnic e da menaschi ch’ei duvrass pil diever public.» Thomas Tanner di che quellas persunas che drovien oz la pendiculara ed hagien in clav seigien instruidas co secuntener e co far diever dalla cabina.

Dependents dalla cabina

Dapi prest 50 onns ein ils da Signina dependents dalla cabina per contonscher lur suloms. Signina ei situau sin ina terrassa fritgeivla ella Cadeina dil Signina. Il bi funs, uauls e pastiras ein denton cunfinai da tuttas varts: Encunter sidost ei la Cadeina dil Signina, encunter sid la Val da Cabiena, el vest e nord la profunda Val da Riein.

A caschun dalla davosa sesida dil parlament communal digl onn 2023 ha la suprastonza communala communicau ch’ins seigi vidlunder d’examinar variantas per sanar la pendiculara.

Andreas Pfister, il menader dall’infrastructura e planisaziun dalla vischnaunca Ilanz/Glion ha confirmau quest’jamna enviers la FMR ch’ins hagi buca fatg ina revisiun dalla pendiculara igl onn vargau. Ei seigi denton vegniu fatg controllas e reparaturas pli pintgas dil pilotadi. Il parlamentari da Riein, Thomas Zinsli, ha detg enviers la FMR ch’el appartegni ad ina cumissiun che hagi da s’occupar cugl avegnir dalla pendiculara da Riein-Signina. Mo el hagi udiu nuot e sappi buca co che quei mondi vinavon. Cun auters plaids vul quei dir che la pendiculara da Riein a Signina sa vegnir duvrada era egl avegnir mo da persunas ch’ein instruidas, han ina lubientscha ed ina clav per ir culla cabina.