Lectura Rumantscha

I dat dus simpels signals che fan ina fin a l’atun plain colur: Sche las chasas èn decoradas cun zitgas da Halloween e sch’i vegn la naiv. Precis per quels dus signals vai oz en la Lectura Rumantscha.

Losanna discuta la rumida da naiv a Riom

Has ti spalà naiv quest’emna? – Probabel betg, schebain ch’il Grischun ha survegnì la notg sin mardi l’emprim tatsch naiv. Ma il sulegl d’atun ha spert puspè fatg svanir la cuverta alva, senza ch’igl era da spalar. Però adatg cun rumir la naiv – quai procura qua e là per dispitas tranter vischins! Ina dispita pervi da la rumida da naiv a Riom – betg tranter vischins, mabain tranter interpresas – è schizunt escalada fin al Tribunal federal. E Losanna ha ussa propi stuì trair ina decisiun en connex cun la rumida da naiv en las streglias da Riom. Tge chaussas!

Ils skelets da Breil

Es ti per u cunter, GEA u NA? – Igl è ina dumonda classica, sco: Rolling Stones u Beatles? Cola u Pepsi? Coop u Migros? – Pia, es ti per u cunter l’usit da Halloween? D’accord u betg d’accord che l’usit irlandais-american sa derasia er en noss conturns? A Breil procura quella dumonda gist per bravas discussiuns, perquai ch’il neo-abitant Przemyslaw Molski, oriund da la Pologna, ha installà ina decoraziun da Halloween. Ina decoraziun? – Na, igl è plitost in entir parc d’aventura cun Draculas e skelets.

Il «grond vitg» da Signina

Jau sun creschì si a Müstair. E là avevan nus flots vischins sursilvans! Vul dir, il bab da la famiglia vischina era da Signina. E perquai raquintavan els mintgatant da lur visitas en la patria dal bab e ch’i dettia là perfin ina pendiculara. Jau m’imaginava Signina lura adina sco grond vitg cun ina gronda pendiculara. – Però enconuschas ti Signina? – Lain dir uschia, «grond» n’è betg il dretg adjectiv per descriver il vitget e sia pendiculara. Ma tuttina datti enturn l’aclaun e la pendiculara da raquintar oz in’istorgia. Betg ina gronda, ma in’interessanta!