Elecziuns da cumbat a Trin

A Trin vegnan las quater suprastontas ni suprastonts elegi directamein sco menaders d’in departament. Quei vul dir ch’igl ei d’eleger per exempel ina menadra ni menader dil departament da baghegiar, dall’economia publica, da scola ni era ina suprastonta ni suprastont responsabels per la segirtad. Quei ei auter a Trin ch’en biaras autras vischnauncas nua ch’ei vegn elegiu quater gerauas e geraus che seconstitueschan denter els e repartan ils departaments.

Duas demissiuns

A Trin dat ei duas demissiuns en suprastonza. Da remplazzar ein Simon Schwarzenbach-Schurter che meina il departement segirtad publica, ambient e planisaziun e Silvia Capatt, la menadra dil ressort scolaziun, cultura e temps liber. Vitier vegn il departament dall’economia publica, agricultura e forestalesser da Hans-Jakob Telli che vegn garegiaus ils 7 da november 2025 da Lukas Kälin che figurescha silla gliesta «Ensemen per Trin».

Ensemen per Trin

La populaziun da Trin ei carschida fetg ils davos decennis. Tenor Wikipedia ei la populaziun da Trin carschida ils davos 25 onns da 1100 sin bunamein 1500 habitontas e habitonts.  Denter auter ein  biaras famiglias giuvnas sedomiciliadas a Trin. En vesta allas proximas elecziuns communalas dils 7 da november 2025 ei seformada la gliesta «Ensemen per Trin» cun ina candidata ed in candidat per la suprastonza e cun ina candidatura per la cumissiun da quen e gestiun. Sper Lukas Kälin ein era Patricia Spreiter e Tillmann Blauss candidats dalla gliesta «Ensemen per Trin». Patricia Spreiter candidescha pe la suprastonza communala e Tilmann Blauss per la cumissiun da quen e gestiun. Dus cavazzins che tuts treis candidats drovan en lur statements el flyer ein l’impurtonza da transparenza e d’informaziun.

Attacca politica

La gliesta «Ensemen per Trin» porta il selvicultur e menader da construcziun Lukas Kälin per la suprastonza communala. El contestescha il departament dil pur Hans-Jakob Telli che appartegn dapi nov onns alla suprastonza communala. Lukas Kälin ha era confirmau enviers la FMR ch’el vulessi suprender il departament da Hans-Jakob Telli. El ha denton era detg ch’el discuori buca cullas medias avon las elecziuns. Quei malgrad che la gliesta «Ensemen per Trin» envida il gliendisdis proxim l’entira populaziun ad ina sera d’informaziun. «Nus essan s’exponi fetg cun tarmetter flyers da nossa gruppaziun en tuttas casadads da Trin. Mo nus vulessan che quella discussiun resti en vischnaunca e buca che miu num vegni derasaus egl entir cantun Grischun.» Las medias vegnien era buc informadas a caschun dalla sera d’informaziun dils 3 da november 2025, ha Lukas Kälin detg.

Ina supresa

Il suprastont communal Hans-Jakob Telli ha detg che l’attacca sin siu post en suprastonza seigi stau ina gronda surpresa per el. «Jeu sun s’engaschaus fetg cun far buna lavur en suprastonza. Jeu haiel fatg quei ussa nov onns ed havessel veramein aunc bugen finiu miu temps da 12 onns cun la davosa perioda d’uffeci.» Ei detti decisiuns en favur dall’entira populaziun dil vitg che plaigien buca a tuts. Perquei detti ei ussa ina gruppaziun che vegli procurar ch’el vegni buca pli reelegius. Mo las elecziuns seigien aviartas per tuttas e tuts e perquei hagi ei num d’haver pazienzia e spitgar silla fin dall’historia il proxim venderdis sera.

Il president communal recandidescha

Il president communal da Trin Maurus Caflisch recandidescha per in’ulteriura perioda d’uffeci da treis onns. Per in’ulteriura perioda d’uffeci en suprastonza candideschan ultra da quei Hans-Jakob Telli e Marco Capatt. Ella cumissiun da quen e gestiun cala Andreas Riesch. Ils dus veders Nino Brenn e Martin Bundi recandideschan per in’ulteriura perioda d’uffeci.