Lectura Rumantscha

Oz porscha la Lectura Rumantscha temas che sa differenzieschan in da l’auter pli u main sco las colurs da la feglia che croda da las plantas il mument avant che l’enviern vegnia.

Difficil da chattar persunal

«Igl è enorm difficil. Nus tschertgain per part plirs mais per pudair occupar ina plazza ed avain er alura be singulas annunzias.» Quai di Stefan Schumacher dal Center da Sanadad Savognin. La mancanza da persunal qualifitgà è gronda en Svizra, surtut en las regiuns perifericas. Ma betg mo en ils ospitals è quai il cas. Tge dimensiun che la mancanza da persunal ha, mussa la plattafurma per plazzas vacantas da Turissem Val Surses Savognin Beiva. Sin quella èn publitgadas actualmain pli che 50 plazzas e quai per ina regiun cun sulettamain radund 2500 abitantas ed abitants.

La «Südostschweiz» cumbatta per lecturs

Es Ti in lectur da gasettas «stampadas tradiziunalas» u gia quel che retira las infurmaziuns quotidianas a moda digitala? Uschè u uschia, il mund da las medias è sa midà e sa mida vinavant. Las gasettas cumbattan cun il dischinteress da bleras e blers per la lavur schurnalistica, mo era cun la digitalisaziun. Pertutgada da quest svilup è era la «Südostschweiz». Adina damain persunas sa prestan in abunament da l’onn per ina gasetta. L’ediziun è sa diminuida ils ultims 15 onns per 39 %. Ils Cuntrasts da RTR han dà in sguard davos las culissas da la gasetta e co ch’ella vegn a frida cun quest svilup. La transfurmaziun digitala s’avanza e cun ella la purschida e quella frunta era sin critica.

Trin e ses sistem spezial d’elecziun

La vischnanca da Trin stat avant l’elecziun da ses gremis communals. Entant che bleras vischnancas han difficultads da chattar persunas ch’èn prontas da star a disposiziun per in mandat u l’auter, datti in cumbat a Trin. Là vegn Hans-Jakob Telli che maina dapi nov onns il departament da l’economia publica, l’agricultura ed selvicultura concurrenzà da Lukas Kälin. Il spezial a Trin: Là vegnan tschernidas commembras e commembers da la suprastanza communala tenor lur interess per ils departaments.

A revair e bun divertiment cun la Lectura Rumantscha!