Prüma etappa da surfabricaziun Alvra a partir da l’avrigl 2026

Per pudair s-chaffir nouv spazi d’abiter per indigens vaiva la radunanza cumünela da La Punt Chamues-ch delibero già in december 2023 ün credit da 13,6 milliuns francs per üna surfabricaziun cun quatter chesas. In quellas sun previsas passa 20 abitaziuns pajablas per indigens. Quel proget dess gnir realiso sün duos parcellas na cunfinantas chi sun in possess da la vschinauncha burgaisa e politica e chi’s rechattan in direcziun dal Pass da l’Alvra.

Insè füss que sto previs cha las lavuors da construcziun cumanzessan già quista prümavaira. Ma cunter las duos chesas sülla parcella da la vschinauncha burgaisa ho que do quist marz ün recuors da seguondindigens tal Güdisch superiur dal Grischun. Perque vaiva la vschinauncha decis d’etapper il proget.

Surdeda da las lavuors auncha quist december

Sün dumanda da la FMR ho il chanzlist cumünel da La Punt Chamues-ch, Urs Niederegger, confermo cha las lavuors per la prüma etappa – dimena las duos chesas sülla parcella da la vschinauncha politica – cumainzan uossa definitiv la prümavaira chi vain. «In quel connex lavurainsa plainamaing e vainsa d’incuort eir be güsta scrit oura las lavuors. Nus vains previs da surder las lavuors auncha quist december, uscheja cha pudainsa cumanzer in avrigl 2026 cul fabricat», disch Urs Niederegger.

In connex cun la seguonda etappa – dimena las duos chesas sülla parcella da la vschinauncha burgaisa – nun ho que tenor il chanzlist da La Punt Chamues-ch auncha do nouvas. Que voul dir cha’l recuors es aunch’adüna pendent davaunt il Güdisch superiur dal Grischun. Cura cha quella seguonda etappa pudess alura gnir realiseda nun es perque auncha cler. E scha las recurrentas e recurrents tressan inavaunt la chosa a Losanna davaunt Güdisch federel, alura varo la vschinauncha da La Punt Chamues-ch d’avair inavaunt pazienzcha cun la seguonda etappa.