Tonscher lunsch ella buorsa

«Per quella damonda ha Marcus Weber duvrau empau dapli temps da ponderar.» Con temps da ponderar ch’il president dil cussegl d’administraziun dallas pendicularas da Mustér ha duvrau, ha il president communal da Mustér, René Epp, buca tradiu il vendergis vargau ella Sala Peter Kaiser dalla claustra da Mustér. Envidau veva la suprastonza communala la populaziun per informar davart ils projects e las investiziuns previdas a Mustér ils proxims onns. E denter quellas investiziuns sesanflan era projects finanziai digl investur ch’ins astga titular senz’auter sco bien padrin dalla vischnaunca da Mustér, Marcus Weber. 

Purschida per famiglias

In niev edifeci planisaus sco parc da giug e moviment gest sper il Center Fontauna duess porscher egl avegnir activitads per affons e giuvenils da temps da schliat’aura. Marcus Weber ha fatg attent als basegns turistics da Mustér da daventar ina destinaziun che carmala turistas e turists era duront la stad ella Cadi. «Per quei intent stuein nus sco destinaziun da famiglias era porscher enzatgei per las famiglias.» Denter nov e diesch milliuns francs ein las pendicularas respectiv Marcus Weber promts dad impunder ella nova halla da recreaziun. Ed el ei era staus promts suenter il temps da ponderaziun dad integrar en quella halla gest aunc in liug da trenament per la gruppa Acrobatica Cadi.

Tenor las indicaziuns da René Epp dat ei sulet treis semeglionts centers da trenament en Svizra ed el ei perschuadius che Mustér sa profitar da quella nova purschida. E sco ei para ei era Marcus Weber perschuadius da profitar essend ch’el surpren ils cuosts da construcziun e las pendicularas il menaschi. La vischnaunca sto perencunter desister dad in emprest dad 1,8 milliuns francs ch’ella ha giu concediu allas pendicularas. La votaziun davart quella fatschenta succeda il mars 2026 ed ella cumpeglia era la damonda da ceder il terren en dretg da baghegiar.

Center da sanadad

Ceder en dretg da baghegiar a Marcus Weber vul la vischnaunca da Mustér era la scola da Segnas. Leu vul Marcus Weber investir en in center da sanadad. Con ch’el ei promts d’investir en quei project, ha el buca tradiu. Marcus Weber ha discurriu dad in provediment da sanadad munglus sisum la Surselva e che quel stoppi vegnir meglieraus er ord vesta turistica. «Natiralmein che la populaziun indigena sa era profitar dalla purschida.» Schar a tscheins igl edifeci vul Marcus Weber al Spital regiunal Surselva che havess da suprender il menaschi. René Epp ha getg il vendergis vargau ch’il cussegl d’administraziun dil Spital regiunal Surselva hagi decidiu da persequitar quella fatschenta. El vesa medemamein la necessitad da meglierar la purschida medicinala era en vesta als novs ressorts turistics planisai a Mustér ed a Dieni. Interessanta vegn segiramein la discussiun enteifer la SanaSurselva, la corporaziun dallas vischnauncas sursilvanas responsabla per il provediment da sanadad, davart in center da sanadad a Mustér menaus dil Spital regiunal Surselva.

Augmentar ils deivets

Era senza las considerablas investiziuns da Marcus Weber a favur dil svilup turistic sisum la Cadi sto la vischnaunca tonscher lunsch ell’atgna buorsa per realisar ils proxims projects. René Epp ha declarau nua e con che la vischnaunca preveda dad investir ils proxims quater onns: Il luvratori communal, la sanaziun dalla via Cons gia decidida dil pievel, la secunda etappa dil Center Fontauna, ed ella serenera vul e sto la vischnaunca per part era investir. Buca meins che varga 20 milliuns francs preveda la vischnaunca da Mustér dad impunder en quels projects.

Il cash-flow futur supponiu dad annualmein 2,5 milliuns francs tonscha buc per finanziar tut ils projects cun agens mieds, aschia che la vischnaunca sto augmentar ils deivets actuals da varga 12 milliuns francs per ulteriurs diesch milliuns. Per René Epp ei quei sforz necessaris per mantener l’attractivitad dalla vischnaunca ed el ei perschuadius che Mustér po supportar ils deivets. «Nus surpassein buc las limitas maximalas ch’il cantun definescha per ils deivets communals.» Mo René Epp sa che la suprastonza communala sa buca mo prender in temps da ponderar sco igl investur Marcus Weber per decider ina investiziun. «Mintga singul project vegn tractaus e decidius dil cussegl da vischnaunca e sco davos dil suveran.»

Ina decisiun ha il suveran da Mustér gia da prender ils 30 da november 2025 per cumprar igl areal Couchpin/Hess amiez il vitg da Mustér. Il president communal ha medemamein presentau quei project e tradiu che la suprastonza speri sin in clar gie per il credit da treis milliuns francs.