Lectura Rumantscha

Ina rotscha texts spetgan oz da vegnir legids, e trais da quels spetgan anc pli vess che tschels, sco la Lectura Rumantscha mussa. Quella fa in gir en la litteratura, digitalisaziun ed acrobatica.

Investir, investir ed anc ina giada investir

La vischnanca da Mustér e Marcus Weber da las pendicularas Mustér n’han bunamain betg pli chalà da palesar dals plans d’investiziun a la saira d’infurmaziun venderdi passà. Varga 20 milliuns francs preveda la vischnanca d’impunder ed era Marcus Weber vul investir. Il grond project è ina halla da recreaziun che duess porscher activitads per uffants e giuvenils da mal’aura ed in lieu da trenament per la gruppa Acrobatica Cadi.

La digitalisaziun palpabla

Da la digitalisaziun vegn discurrì e discutà dapertut. Ma co far palpabel quel svilup ed er ils privels da quel? L’artist René Fritschi ha perquai creà l’ADD-Man, ina poppa da moda che consista da cabels, fibras da vaider e plattinas enstagl d’in intern organic. L’installaziun ch’è exposta actualmain en la chasa da scola a Scuol duai carmalar scolaras e scolars da far ponderaziuns davart la digitalisaziun ed ils effects da quella.

Emblidà ils cudeschs a Domat

Ils Dis da litteratura han fatg midada ed han emblidà ils cudeschs a Domat. – Uschia pudess ins resumar la 34avla ediziun che ha gì lieu l’emprima giada en la Postremise a Cuira questa fin d’emna. Tenor la redactura da la FMR n’han ils cudeschs dentant betg mancà, cunquai che autras furmas litteraras performativas han emplenì il plaz, tenor il titel dals Dis da litteratura «perfRomanza». Mancà ha dentant in pau il plaz.

A revair e bun divertiment cun la Lectura Rumantscha!