Momo va culla corna

«Igl ei ina biala renconuschientscha per nies giubileum da diesch onns», remarca Valentina Montalta. Ensemen cun ina gruppa da persunas ei la dunna da Glion stada envidada dacuort a Cuera – per ina caschun speciala. Avon diesch onns, il mars 2015, ha ella ensemen cun ina gruppa da persunas fundau l’uniun Momo. Aunc oz presidiescha ella quella. A caschun dalla sera annuala dall’organisaziun «Bündner helfen Bündnern» ha Valentina Montalta priu encunter per sia uniun in premi prestigius.

«Zatgi ha annunziau nus»

L’organisaziun ha surdau per la tschunavla gada ils premis grischuns per la lavur communizeivla ed in engaschi social a favur da glieud basignusa. Il num dall’uniun Momo sebasa sil cudisch d’affons da Michael Ende che raquenta dalla mattatscha Momo che regala siu temps ad auters. Intent dall’uniun cun sedia a Glion eis ei da regalar temps ad affons che piteschan da differentas malsognas e ston star pli ditg en spital. «Per quei s’engaschein nus trasora», declara Ladina Volken, ina giuvna mumma e suprastonta dall’uniun. E Nicole Arpagaus, l’actuara e mumma d’affons da scola, aschunta: «L’uniun survegn grond sustegn da tuttas varts.» Zatgi hagi annunziau lur uniun pil premi grischun. Ellas sappien buca tgi, denton detti quella distincziun bia cuntentientscha e motivaziun, tradescha Valentina Montalta.

Il grond sustegn pudess motivar buca mo las treis suprastontas. Sco quei che Valentina Montalta informescha el discuors culla FMR, dumbra l’uniun actualmein varga 120 persunas, firmas, fauturas e donaturs. Mintgina segida cun ina contribuziun annuala fixa ni cun ina donaziun. L’uniun cul logo dalla buobetta Momo e l’ura ei presenta dapi la fundaziun a diversas occurrenzas. Ella ei daventada enconuschenta cul stan da fiera per rimnar daners, cun activitads da zambergiar e seras da concert.

Purgameina «Da Tempus»

Dapi la fundaziun s’engascha l’uniun el Spital cantunal a Cuera. Grazia al sustegn cuntinuau da tuttas varts sa l’uniun finanziar ina scolasta ed ina mussadra da scoletta ella partiziun pediatrica. Quellas persunas regalan als affons e giuvenils tochen 18 onns temps, cun zambergiar e far giugs, raquintar historias, cantar e far musica, ir a spass, discutar e bia auter. Era ina gruppa da voluntarias ei seformada. Quella vegn en acziun sche la scolasta ni la mussadra el spital cantunal ha vacanzas. Per ina tochen treis uras substitueschan mintgamai duas voluntarias las persunas d’assistenza ella partiziun staziunara, egl ambulatori ed el schinumnau Schlupfhaus dil spital cantunal.

Martin Candinas, dapi onn vargau in dils ambassadurs da «Bündner helfen Bündnern», ha saviu surdar a Valentina Montalta la purgameina enramada culla distincziun «Da Tempus». «Vossa lavur voluntaria ei exemplarica per tuts», ha il cusseglier naziunal declarau. En sia laudatio ha el menziunau specialmein gl’engaschi e la prestaziun dall’uniun Momo. «Nus schazegein fetg il grond sustegn che nus survegnin adina puspei dalla populaziun. In grond engraziament persuenter», puntuescha Valentina Montalta. Ella sappi garantir che mintga franc che l’uniun Momo retscheivi, vegni duvraus pils affons el spital.