La cuorsa liunga viva vinavon en Val Tujetsch

Ils 21 da mars 2025 ha il comite d’organisaziun dil Surselva Maraton communicau ch’el cuntinueschi buca pli cull’organisaziun dil maraton. Ils motivs principals persuenter ein stai la participaziun alla cuorsa ch’ei sereducida ils davos onns, mo lu era igl interess dalla glieud da surprender ina funcziun ni l’autra el comite d’organisaziun. Sin in appel dil comite d’organisaziun egl organ ufficial dalla vischnaunca, La Tuatschina, ei negin s’annunziaus che havess giu interess da s’engaschar el comite. La decisiun da calar cul Surselva Maraton ei allura era vegnida communicada a Swiss Ski. Aschia svanescha il maraton ord il calender dil Swiss Loppet. Igl unviern vegnent figureschan treis concurrenzas popularas da cuorsa liunga dil Grischun el Swiss Loppet: Planoiras ils 11 da schaner, Engiadina La Diagonela ils 17 da schaner ed il Maraton dall’Engiadina ils 8 da mars.

Vinavon concurrenzas

Malgrad il na al Surselva Maraton vulan treis persunas ch’ein s’engaschadas ils davos onns per la cuorsa liunga en Val Tujetsch – Toni Cathomen, Guido Friberg e Monica Bearth – buca trer cumpleinamein la faultsch el canvau. «Cun nies engaschament lein nus sustener vinavon la cuorsa liunga ella val. Igl ei impurtont ch’ils giuvenils hagien in avegnir en quei sport e las pusseivladads da concurrenzar», di Toni Cathomen. Igl ei previu d’arranschar ton cuorsas regiunalas sco cantunalas e naziunalas era igl avegnir a Sedrun/Rueras. «Las loipas che stattan a disposiziun per concurrenzas naziunalas ein vegnidas homologadas da niev. Quei vala pils proxims tschun onns», declara Toni Cathomen che s’engascha vinavon sco cau-cuorsa (mira era box).

Collaboraziun dils clubs

In emprem termin pigl unviern vegnent ei gia fixaus. «Ils 6 da fevrer 2026 organisein nus ina cuorsa dil Cup Energia alpina, il cup regiunal da cuorsa liunga dalla Surselva. La cuorsa ha liug la sera da cazzola el center da sport a Sedrun/Dulezi», di Toni Cathomen. Damai che l’illuminaziun seigi avon maun leu, veglien ins far quell’emprova: «Igl ei ina ga zatgei auter.»

Gia ils 24 da schaner 2026 han liug ils dis da cuorsa liunga da giuventetgna e sport en Surselva. En tgei liug ch’els vegnan arranschai ei aunc buca decidiu definitivamein. «Sco gia tiels campiunadis grischuns da cuorsa liunga a Breil 2024, vegnan tut ils clubs da skis dalla Surselva a collaborar vid quels dis. La finamira ei veramein da luvrar pli stretg ensemen», declara Toni Cathomen.

Era Swiss Cup igl avegnir

Sper cuorsas regiunalas dil Cup Energia alpina e las cantunalas dil Raiffeisen Nordic Cup vul Sedrun/Rueras era organisar igl avegnir concurrenzas naziunalas. «Concretamein patertgein nus vid il Swiss Cup. Ils emprems discuors cun Swiss Ski han giu liug, la finamira ei d’organisar ina cuorsa igl unviern 2026/27», di Toni Cathomen. Swiss Cup ei ina retscha da cuorsas en differents loghens surtut per curridras e curriders giuvens. Per garantir l’organisaziun da cuorsas a liunga vesta vul il comite d’organisaziun animar giuvenils da s’engaschar per la cuorsa liunga ella Val Tujetsch. «Nus essan ussa en ina fasa pli ruasseivla d’organisaziun, aschia che nus essan da buna speronza che quei reusseschi», di Toni Cathomen. Anflar voluntaris e gidonters pils dis da cuorsa seigi mintgamai negin problem. La difficultad principala seigi ch’ei detti paucas e paucs che veglien surprender responsabladad.