In triep surpresas a Ruschein

«Buca tradescha lu damemia», ha ina dallas cantaduras admoniu. Il comite d’organisaziun ha envidau la FMR ad in exercezi pil project ch’il Chor mischedau da Ruschein prepara. Ed ussa duess il redactur communicar nuot da quei che spetga sonda proxima? La halla Crestas vegn perinagada a s’emplenir cun visitaders marviglius che han bugen surpresas. Ils biars dils varga 100 bigliets d’entrada ein numnadamein reservai. Els seigien tut surpri digl interess che la populaziun muossi, remarca in dils cantadurs.

Varga 100 plazs ein reservai

Ils da Ruschein preparan lu era buca in concert convenziunal. «Ei dat enquala surpresa», declara Patricia Cadruvi, la dirigenta dil chor. Ed il president da quel, Alex Cola, conceda: «Nus selegrein sin sonda ed essan plein slontsch da beneventar ina sala pleina». Sco quei ch’el gi ein pli che 100 plazs reservai. La FMR ha giu caschun da seperschuader ch’ils visitaders astgan selegrar sin ina truppa che porscha recreaziun e cuort’uriala. Sche tgei astg’ins insumma tradir da quei «event» a Ruschein – per buca rumper gl’effect dalla surpresa?

Il menu da quater tratgas duei restar ina surpresa. Tgei che vegn ad esser sils tagliors, tradeschan certs plaids. Grissinis da Maria Casper, tschei racoltau da Leo, quei preparau dad Ismael ed Antoni, gl’auter da Pieder pur. Il siemi dultsch ei da Giuanna, Annamaria e Clara. E la dirigenta sezza ha preparau ina spisa cun carezia.  Las 24 cantaduras e cantadurs ein responsablas ch’ils tagliors empleni vegnien survi endretg e conform.

Las persunas che han reservau lur plazs e seschau entusiassmar digl invit san sulettamein ch’ei dat in concert cul motto «cant e calorias». Ins dueigi schar ir bein e guder, scriva il chor. Las surpresas dueigien restar confidenzialas tochen il davos. Duront ch’ils hosps gaudan la tscheina, vegn il chor a divertir cun canzuns popularas romontschas, talianas e tudestgas, ei dat intermezzos solistics e scenas veramein divertentas. La variaziun vegn buca a muncar. Alex Cola tradescha aunc in detagl: «Il program da canzuns ei dedicaus al motto ‘recepts per la ventira’ ed alla damonda tgei che nus druveien per esser ventireivels». Gia oz, zacons gis avon il concert, sa il president dil chor esser satisfatgs. Il comite d’organisaziun haveva giu respect e temiu che mo ina ni duas persunas reserveschien plazs. Actualmein eis ei pli che 100 che spetgan vess sil «menu de surprise» e che selegran dalla purschida musical-culinarica ella halla Crestas a Ruschein.