Midadas en favur da tuttas e tuts

La finamira principala seigi ei da transformar ina dallas treis partiziuns da tgira actualas en ina nova partiziun da habitar cun ina bassa intensitad da tgira, di Ursulina Cadruvi, la menadra dil Da Casa Val Lumnezia. «Da niev offeressen nus combras a hosps ch’ein reconvalscents, a persunas ch’ein stadas el spital ni era a senioras e seniors che drovan negina ni mo pauca tgira.» Il basegns per quella purschida seigi avon maun ton en Surselva sco era ordaifer la vallada, di ella. «La nova purschida savein nus cuvierer cun forzas da lavur internas da nossa gastronomia, hotellaria e dall’activaziun. Quellas collaboraturas e quels collaboraturs han repetidamein mussau grond interess da suprender lavurs che stattan en lur cumpetenza ella nova purschida dil Da Casa.»

Duas partiziuns da tgira

La nova organisaziun dil Da Casa Val Lumnezia pretendi ina midada dalla structura, di la menadra dall’instituziun. «Entochen ussa havevan nus singulas combras vitas sin tuttas alzadas da nossa casa. Da niev vegnan las combras vitas ad esser concentradas sin in’alzada. Dasperas havein nus aunc duas alzadas cun letgs da tgira», di Ursulina Cadruvi. Ella menziunescha ch’ei vegni a dar duas squadras per las cussadentas e cussadents da tgira. Quellas squadras sustegnien plinavon il team dalla gastronomia e dall’activaziun cun las paucas lavurs ella partiziun da reconvalescenza. «Nus prendein gest era la caschun d’optimar ils pensums da lavur dils dus novs teams. Nus vulessan corrispunder al giavisch da far survetschs pli attractivs per tuttas e tuts. El concret vul quei dir che nus vulessan satisfar ad in ferm giavisch da nies persunal da dismetter ils survetschs en duas parts dil di.» Quei muntassi era ch’il Da Casa sco liug da lavur daventassi pli attractivs per forzas da lavur ella tgira.

Las forzas specialisadas mauncan

Sco per autras instituziuns da tgira seigi ei era pil Da Casa Val Lumnezia ina gronda sfida da recrutar persunal da tgira, scriva l’instituziun en sia communicaziun da medias. Malgrad las stentas intensivas dils davos onns seigi ei buca stau pusseivel d’occupar permanentamein las plazzas necessarias per la capacitad cumpleina da 58 letgs da tgira. Cun la nova structura planisada han ils responsabels dil Da Casa Val Lumnezia la finamira da saver occupar ils letgs per 93% igl onn 2026.  La menadra dall’instituziun Ursulina Cadruvi ei perschuadida che las midadas da structura portan era ina nova dinamica allas collaboraturas ed als collaboraturs. «Nus havein in fetg bien team che lavura veramein cun cor. Per mei ha il bien clima da lavur che regia ussa gronda prioritad. Mo aschia eis ei pusseivel da porscher igl optimal a nossas cussadentas e nos cussadents che han gie veramein meritau d’haver bi e bien tier nus.»

In pass impurtont

Las midadas da structura vegnan realisadas naven digl atun 2025 cun ina sera d’informaziun pil persunal che ha giu liug ier gliendisdis sera. En connex culla situaziun finanziala dil Da Casa Val Lumnezia dat ei midadas bufatgas el mument, di Ursulina Cadruvi. «Cun occupar ils letgs vits cun hosps en reconvalescenza e da vacanzas havein nus entradas era da quels letgs. Pia sa ei mo vegnir meglier.» Ella communicaziun da medias ch’il Da Casa Val Lumnezia ha tarmess ier gliendisdis stat ei scret che l’instituziun quenti da far in pass strategic che detti la caschun all’instituziun da seposiziunar meglier silla fiera egl avegnir. Entochen la primavera 2026 duei la nova purschida esser introducida dil tuttafatg. Il Da Casa Val Lumnezia ei l’emprema casa da tgira che realisescha ina cumbinaziun da partiziuns da tgira e d’ina partiziun da reconvalescenza.