La reavertura s’entarda

Il Parkhotel Waldhaus, il sulet resort da tschun steilas el nord dil Grischun, ha entschiet l’entschatta settember 2024 in capetel niev. Transparenza, e buca speculaziun, han ils possessurs novs empermess avon in onn. La reavertura previda sigl unviern 2025/26 s’entarda ussa denton per in onn. «Gie, quei constat. Nus essan s’entupai gl’uost ed els han communicau quei aschia», conferma il president communal da Flem, Christoph Schmidt in rapport digl emittur RSI.

Pli ditg che spitgau

La FMR ha dumandau Christoph Schmidt sch’el hagi intervegniu las raschuns daco ch’iI Parkhotel Waldhaus vegni aviarts pér silla stagiun 2026/27. Ella pagina d’internet dil resort san ins leger il suandont avis: «Dear Valued Guests. We look forward to welcoming you back for the Winter Season 2026 – 2027 and will keep you informed of the official reopening date. We can’t wait to host you again in our beautifully refreshed resort, nestled in the breathtaking Swiss Alps!» – Els possien strusch spitgar da beneventar ils hosps sill’entschatta dalla stagiun d’unviern 2026/27, las lavurs da renovaziun cuozien pli gitg che spitgau.

Per tgei motivs che las lavurs seretardan ei buca enconuschent. Christoph Schmidt sa confermar sulettamein che gl’entir cumplex resta serraus aunc in onn. Ils 4 da settember 2024 haveva la suprastonza communala da Flem communicau che la Paval Holding dalla Rumenia, en partenadi culla gruppa Apex Alliance dalla Lituania, hagi acquistau dalla Z Group americana l’immobiglia per in prezi da 70 milliuns euros. Avon prest in onn havevan Dragos Paval e sia feglia Carina Paval, ensemen culla plidadra dalla Apex Alliance, Georgiana Grigoras, priu part dalla radunonza communala ed annunziau ch’ins vegni ad investir plirs milliuns francs. Els veglien mantener e migliurar il caracter dil resort e ses edifecis, siu patrimoni historic da 150 onns cul mobigliar intern. Daferton ha la societad proprietaria nova cumprau anavos dalla vischnaunca da Flem la Waldhaus Arena cun ina surfatscha da 6000 m².