La spezaria da la stagiun

Tuttas stagiuns han lur avantatgs. L’atun datti bler da racoltar e l’enviern èsi da mangiar ils products da l’iert e dal curtgin. Tranter auter è quai la maila ch’ins ha forsa magazinà. U tartuffels, carottas, giabus u er ina zitga. Tgi che n’ha nagina pussaivladad da conservar tscherts fritgs e legums na sto betg murir da la fom. En ils negozis pon ins cumprar tut quai ch’ins giavischa. Quels na vendan betg sulettamain conservas, mabain er fritgs e legums da tut il mund.

Ussa è il temp da las veschlas da maila. Igl è mia tratga preferida da l’enviern. Ellas èn er conuschentas cun il num cocas-maila. Co ch’ins producescha quellas na stos jau betg scriver. Mintga uffant sa ch’ins fa ina bella pasta d’omlettas ed aschunta la maila sgrattada. Mes tip: Prender blera maila e pauca pasta. Gist uschè bler ch’ella po tegnair ensemen la maila. Sch’ins sgratta la maila senza la paletscha, vegnan las veschlas pli finas. Alura simplamain metter in mez chaz da la maschaida en l’ieli chalira da la chazzetta. Dus chazs plains duessan tanscher per far quater veschlas.

Pli baud metteva la mumma, cura ch’ella auzava las veschlas or da la chazzetta, zutger e chanella sur quellas. Pir dacurt avain nus scuvrì ina spezaria che è bler pli fina e decenta che la chanella. Ella sa numna «Wiiguetzli-Gewürz» ed il producent è Hansjörg Stoll da Löhningen en il chantun Schaffusa (e-mail: hj_stoll@bluewin.ch) Il stgarnuz da 100 gr cuntegn ina maschaida da neghel, chanella, paiver da piment, lain da sandel e zutger. Questa spezaria, duvrada plitost per biscuits, s’adattescha excellent per las veschlas da maila.