Proxima premaveira è igl luvratori pront

Cun contactar Martegn Netzer, el tgi segna per la direcziun dalla gruppa digls 15 luvrants communals digl cumegn da Surses, è el sa musso tot cuntaint chegl tgi pertotga la construcziun digl nov luvratori da cumegn a Savognin a Davos Fallung. El dei: «Anfignen ossa è tot ia tenor plan ed ia dastg deir tgi ischans er sen buna veia cun la realisaziun digl bietg.»

Martegn Netzer è naturalmaintg ventirevel tgi igls sies 15 collaboratours da cumegn retschevan en luvratori communal adequat, en bietg necessaris ed en object cun tot chegl tgi totga tar la basa fundamentala d’en luvratori da cumegn. Igl cumegn da Surses è chegl tgi pertotga la surfatscha tuttegna egn digls pi gronds cumegns dalla Svizra. Anc èn igls vehichels, las maschinas ed igl material dalla gruppa da lavour digl cumegn repartias an 14 lis ed ainten l’antiera val. An seis meis totga chegl alloura agl passo, cun anfignen alloura esser igl nov luvratori communal da Surses pront. Investos vignan per chel davart digl cumegn da Surses radond treis milliuns francs.

Bleras interpresas dalla regiun

Fatgas da nov èn er neidas las garaschas tgi sa cattan tar l’antrada digl plaz dalla deponia da rusment Davos Fallung, per material, mundadeiras, roba ed otras tgossas tgi vignan dismessas. Tras chellas garaschas ò per exaimpel en campiun cun ena tramosa (Mulde) a madem mument er access tigl plaz da rusment. Schiglio servan ellas scu garaschas per maschinas e vehichels.

Construia è igl nov luvratori communal digl cumegn da Surses nia tenor igls plans da Jacqueline Bergamin da Tumegn. Uriunda è ella da Lai, canoscha pero Savognin fitg bagn cun aveir fatg plans er per tgesas a Savognin. Martegn Netzer dei er tgi seia nia luvro speditivamaintg ed el seia er da buna speranza tgi alla fegn da mars antschatta d’avregl 2026 vegia la sia gruppa en luvratori communal adatto. El ò er menziuno tgi la planisadra digl bietg ed igl cumegn da Surses vegian risguardo per la realisaziun da chel project tant scu pussebel interpresas dalla regiun.

Uscheia ò la firma Patterlini SA da Lai fatg la construcziun da meir. Per las installaziuns electricas è la Savoldelli SA da Savognin responsabla e pigls indrezs sanitar segna l’interpresa Spescha SA da Lai e Cunter. Las lavours da lenn fò la Uffer SA Savognin e Roland Kolb da Savognin cun ena firma partenaria da Tusang. Igl è tgunsch pussebel tgi gio per chest anviern è pussebel da far diever digls locals tgi sa cattan agl partera digl bietg, gist per metter sot tetg maschinas u er material e roba.