Chanel No. 5

Miu manti freda da tschaguolas. E da mei – denton en ina versiun che ha gia viu megliers dis. Jeu level lavar el, propi. Mo lu haiel jeu tertgau: Forsa freda la veta semplamein mintgaton aschia. Da tschaguolas.   

Vestgadira raquenta historias. Mia schlingia per exempel seregorda aunc dalla sera da raclette. Mias jeans portan l’odur da sutgas, bauns, canapès – da seser. Miu sac dallas caultschas freda da muneida, fazalets, gliesta da cumpras e schiglioc da caussas ch’jeu haiel ord spir prescha catschau en sac avon ch’ir ord casa.

Ins freda vid in carstgaun, schebein el ha giu vacanzas ni sch’el ha fatg sururas. Sch’el ei staus tier sesez ni memia ditg tier auters. Sch’el ei gest staus sut la duscha, en nuegl, el kebab ni sch’el ei frestgamein s’inamuraus.

Jeu crei che nus sutvaletein las odurs e las regurdientschas ch’ellas portan. Negin seregorda dil siatavel chat da WhatsApp dil mardis vargau, mo mintga persuna sa aunc co il parfum dall’emprema amur ferdava: in tec dultsch, freh ed aventurus. Ni dalla cuschina dalla tatta: da suppa e la ferma perschuasiun che pischada fetschi tut meglier. 

Magari tratg’jeu che l’odur dad ier seigi sc’ina amitga sincera. Ella di buc: «Ti vesas ora bein.» Ella di: «Ti vivas aunc.» Quei ei gie era schon enzatgei. Forsa stuessen nus tedlar pli savens sin talas amitgas. Quellas che fan negin belbel. Quellas che restan semplamein – era en silenzi. Sinceradad freda gie buc adina bein, mo ella semantegn persuenter ton pli ditg.

Jeu fredel bugen da caussas ch’ein schabegiadas. Da discuors, els quals ins ha ris memia dad ault e quei schegie ch’ins leva scutinar. Da notgs plein ideas e memia pauca sien. Da calzers ch’ein sepiars sin via. Da muments che din: Ti eis cheu. Ti vivas. E gest quei, mia buna glieud, perquei vai.

E sch’enzatgi di «ti fredas da giuado», sch’ei quei il pli bi insumma. Giuado – leu nua che carstgauns ein, casualitads, veta, buna sco era schliat’aura.

Basta – jeu lavel pia buca miu manti. Aunc buc. El freda da mei – e per dir sincer – meglier che mintga Chanel No. 5.

Patricia Tschuor-Marques viva a Rueun. En il mintgadi suonda ella gugent ses nas e rimna istorgias.