Permiss per implaunt fotovoltaic grand a Samedan

La Regenza ho concess a la Energia Solara Engiadinaisa SA (in fundaziun), suot tschertas cundiziuns, il permiss da fabricher ün grand implaunt fotovoltaic alpin in vicinanza da la vschinauncha da Samedan. La Energia Solara Engiadinaisa SA consista da las fundaturas TNC Consulting SA, Energia Samedan, Alpiq SA ed IWB Energie Schweiz SA. La vschinauncha da Samedan vaiva appruvo il proget ils 13 lügl 2023. Düraunt la procedura da permissiun haun las petentas dumando püssas voutas üna prolungiaziun dal termin per schoglier protestas.

Cultivaziun agricula eir in avegnir

Il proget prevezza, scu cha la Regenza ho comunicho in gövgia, da fabricher ün implaunt fotovoltaic i’l territori traunter la plazza aviatica da Samedan e l’Ova da Flaz. Il lö es situo sün 1700 m s.m. in stretta vicinanza dal stabilimaint d’infrastructura grand da la plazza aviatica regiunela. Sün üna surfatscha da circa 21 hectaras dessan gnir installos var 26 800 moduls solars. La prestaziun totela da l’implaunt importaro circa 14,5 megawatts-peak. Planisedas sun üna producziun annuela da circa 18,8 uras gigawatt scu eir üna producziun da 615 kilowatts-peak düraunt il mez an d’inviern. Ils moduls solars gnaron installos verticalmaing cun in angul d’inclinaziun da 90 gros per ragiundscher üna producziun d’electricited maximela, pustüt düraunt ils mais d’inviern. La distanza traunter ils singuls moduls saro 6,5 meters, que chi permetta da druver la surfatscha eir inavaunt per l’agricultura.

In duos etappas

Cha que saja previs da fabricher l’implaunt in duos etappas, infuorma la Regenza, «la prüma dess esser termineda la fin dal 2027, l’otra il 2028». I’ls sectuors sensibels da l’implaunt gnaro que per granda part desisti da fabricher fundamaints da betun. «Impè da que vegnan realisedas soluziuns stablas e reversiblas.» Al süd da l’implaunt gnaro fabricho ün edifizi tecnic chi cuntgnaro alternatuors e transfurmatuors. Sur duos staziuns da transfurmaziun gnaro l’electricited furnida a la rait electrica existenta. Il chanel da cabels per la colliaziun cun la rait gnaro fabricho a maun da perfuraziuns cun ardschanteda suot la pista da la plazza aviatica, que per na disturber il manaschi aviatic.