«Ins ha vis a vegnir u almain stuì far quint cun quai»

Per Urs Cadruvi n’è la decisiun en l’Engiadin’Ota betg stada in «supergau». Ins haja stuì far quint che la cunvegna da prestaziun per il provediment da sanadad en l’Engiadin’Ota fa naufragi (guarda La Quotidiana dad ier gievgia). En emprima lingia saja uss impurtant da mantegnair il persunal clav e procurar che quel restia, malgrà malsegirezzas, uschè ditg ch’i dat anc ina purschida. Tenor Urs Cadruvi è quai ina dumonda dals chaus che lavuran ensemen. Urs Cadruvi è dapi il november 2022 directur da la clinica Hirslanden Stephanshorn a Son Gagl. Dal 2017 fin 2022 è el stà directur da l’ospital da Schiers.

Cooperar n’è betg in tema nov

Envers il plan B che stat il mument en discussiun ha l’expert d’ospitals ina tenuta positiva. Tenor el pudess questa cooperaziun tranter ils dus ospitals Samedan e Clinica Gut funcziunar. I saja ina soluziun ch’ins haja gia discurrì blers onns en Engiadin’Ota. Co che l’organisaziun da tschellas prestaziuns ch’èn colliadas cun l’ospital pudess guardar ora, sco per exempel il salvament, las chasas da tgira e la spitex, è per Urs Cadruvi relativamain cler. «Far ina purschida integrativa è in concept da success ed ir ensemen cun auters partenaris che porschan il medem pudess esser la dretga via.»

Guardar tge ch’ins dovra

Per Urs Cadruvi è era la gronda dumonda, sche l’ospital a Samedan sto propi avair ina purschida uschè gronda. Il mument saja quai sco in kiosc, di el. Ins duaja ussa guardar, tge ch’ins dovria exnum e tge ch’ins possia laschar davent. «Impurtant èsi per l’ospital a Samedan ch’ins possia tractar cas urgents.»

Tuttina dovria in pachet attractiv per collavuraturas e collavuraturs sco per exempel per chirurgs. In chirurg che ha mo dad operar trais giadas l’onn na gudognian ins betg per l’ospital da Samedan. Sto lura il Chantun gidar en talas situaziuns e far in concept? – Urs Cadruvi è da l’opiniun ch’il Chantun haja definì in concept dapi l’onn 2017. En quel haja el scrit ch’ins veglia ina ferma medischina en las regiuns. Il Chantun sez n’è dentant betg il proprietari, mabain savens fundaziuns u societads che vegnan purtadas da las vischnancas. «Perquai na po la Regenza betg far bler en quest senn.» Tenor Urs Cadruvi ha il Chantun mo ina pussaivladad: definir en tge ospital ch’i vegn fatgas qualas intervenziuns.

D’excluder ch’i dettia anc ina giada in tal scenari na saja betg pussaivel. I dettia er auters ospitals che han forsa er be tants cas per onn sco Samedan – numnadamain radund 2500. Pli pitschen che l’ospital è e pli grev ch’i saja cun quellas tariffas da gudagnar daners per na scriver cifras cotschnas, declera Urs Cadruvi.