Sentupada dils proprietaris da casas Surselva

Gliendisgis, ils 17 da november 2025, envida l’Associaziun dils proprietaris da casas Surselva ad ina sera d’informaziun a Schluein. L’associaziun ei ina dallas grondas uniuns dalla Surselva, ella dumbra actualmein exact 1950 commembras e commembers. Duas gadas ad onn s’entaupan quellas e quels, la primavera alla radunonza generala e gl’atun ad in’occurrenza tematica. Quella d’atun ei uonn a Schluein. Ella casa da scola vegnan las visitadras ed ils visitaders a saver tedlar plirs referats davart il svilup actual dall’infrastructura en Surselva. Il referat corrispundent da cussegliera guvernativa Carmelia Maissen ei titulaus «Forza hidraulica 2050 – il motor verd dil futur dil Grischun». Reto Knuchel, il schef digl Uffeci cantunal da construcziun bassa dat ina survesta dils luvratoris e plazzals actuals e pendents. Plinavon vegn Thomas Schmid, il schef digl Uffeci cantunal d’energia, a plidar davart il traffic public en Surselva sco factur per l’attractivitad dalla regiun. La finala presenta il cussegliader e menader da projects Walter Hartmann a discuorer davart la telecommunicaziun cun transmissiun ultralada.