Hans Jakob Telli ha fatg frunt al concurrent Lukas Kälin

En vesta allas elecziuns communalas a Trin ha ei dau discussiuns surtut pertuccont il cau dil departament dall’economia publica. Per quel ha Hans Jakob Telli recandidau, ferton che Lukas Kälin ha medemamein vuliu occupar quei post da gerau ils proxims treis onns. La fin finala ein vischinas e vischins da Trin sedecidi il venderdis sera da reeleger il mandatari en uffeci, Hans Jakob Telli. El ha contonschiu il pli absolut.

Vegni reeligi ein era il president communal Maurus Caflisch (departament administraziun communala, sanadad e finanzas) e gerau Marco Capatt (departament da traffic e baghegiar). Da niev en suprastonza communala entran Patricia Spreiter (departament da segirtad, ambient e planisaziun dil spazi) e Carolin Tobler (departament da formaziun, cultura e temps liber). Ellas remplazzan Simon Schwarzenbach-Schurter e Silvia Capatt che havevan demissiunau. Sco vicepresident communal per la perioda d’uffeci 2026 – 2028 ha la radunonza communala tscharniu Hans Jakob Telli.

In niev ella cumissiun da gestiun

Vegni reeligi ella cumissiun da gestiun ein Martin Bundi e Nino Brenn. Per Andy Riesch ch’era seretratgs ein Tillmann Blauss e Silvio Caprez stai a disposiziun per l’elecziun. La fin finala ha Silvio Caprez contonschiu il pli absolut.

El cussegl da scola ha Trin tscharniu Carolin Tobler (ex officio sco commembra dalla suprastonza communala) e reeligiu Curt Casty, Martina Frischknecht e Marc Adam. Da niev entra Nina Aregger en quel. Reeligida vegn l’entira cumissiun da baghegiar cun Marco Capatt (ex officio sco commember dalla suprastonza communala) sco era Sandro Blöchlinger e Michael Jehli. Sin fundament dallas demissiuns da Silvia Wick ed Alfred Casty e per munconza da candidatas e candidats restan ils sezs dalla cumissiun da naturalisaziun vacants. Plinavon han vischinas e vischins da Trin eligiu la cumissiun da meglieraziun e la cumissiun da schazetg. En quellas ein tuts mandataris vegni reeligi. 319 votantas e votants ein stai presents allas elecziuns il venderdis sera.