Dil clown alla vacca rienta

A biaras e biars ei Hubert Venzin (68) da Rueras enconuschents sco actur e reschissur da teater. Sco giuvenot da gnanc 20 onns eis el staus l’emprema ga sin tribuna ed el decuors da quels tschun decennis ha el giu pil pli ina rolla dubla: Quella dil reschissur e part era translatur da tocs da teater, mo lu era sco actur. Fetg bein enconuschenta ei denton era si’aveina creativa. Gia dil temps ch’el fageva aunc il pur ha el enschiet a malegiar. 2003 eis el sedecidius da serrar il menaschi puril ed ord il nuegl e clavau sper casa ha el formau ina stizunetta e la gallaria d’art Aquarella. Quella ha el aviert avon exactamein 20 onns.

Exponiu e giu success

«En sesez hai jeu entschiet a malegiar per passatemps. Pertscharts che mes maletgs hagien lu dapli valeta che quei ch’jeu hai manegiau sun jeu daventaus pér cura ch’in artist ha fatg attents mei sin quei», di Hubert Venzin. El ei lu vegnius envidaus ad exposiziuns, ha mussau ses maletgs denter auter a Turitg e Basilea, mo era en Surselva. Maletgs en aquarel d’animals e cuntradas ein stai sias empremas ovras e quellas han cattau igl interess da biaras e biars. «En quellas rodund 15 exposiziuns hai jeu giu success e sentiu il plascher dalla glieud vid mias lavurs», seregorda Hubert Venzin.

Cull’avertura dalla gallaria Aquarella ha el saviu scaffir spazi per exponer permanentamein sias lavurs. Ell’emprema alzada digl anteriur baghetg d’economia ha el endrizzau ina stizunetta cun regals, ella secunda ina gallaria per exposiziuns. Plirs onns ha el era mussau leu ovras d’autras artistas ed auters artists. Igl onn 1995 ha Hubert Venzin era publicau in cudisch: «Clowns sco ti ed jeu». Dapi ch’el s’engascha artisticamein ei quel restaus sia suletta publicaziun. «Zaco havess jeu gust da far in secund cudisch, mo il mument ei nuot concret», relata Hubert Venzin.

Dil figurativ agl abstract

L’exposiziun actuala che ha giu vernissascha la sonda vargada dat in’investa egl entir spectrum da lavur d’art da Hubert Venzin ils davos 40 onns. Quei spectrum ei vasts e remarcabels enina. Spels maletgs en aquarel cun clowns paradescha ella gallaria Aquarella era art abstract e sculpturas. Digl aquarel eis el arrivaus ils davos onns agl acril sin lenn cruschau, teila ni cartun. En sia lavur finala sco catechet ch’el ha frequentau da 2003 entochen 2005 ei Hubert Venzin sefatschentaus da siat maletgs dalla Via dalla Crusch: «Jeu hai entschiet a malegiar en miu stil figurativ. Quei ha denton buca cuntentau mei e dad in da quels maletgs hai jeu lu semplamein vuliu lavar giu la colur cun ina spungia. Enten far quei e la mischeida da colurs ei sedau in muster tut special che ha fascinau mei.» Dapi lu ha el scaffiu pliras ovras abstractas che dattan all’exposiziun dallas lavurs dils davos 40 onns in accent tut special.

Figuras ord arschella

«Avon rodund 15 onns hai jeu vuliu sefatschentar aunc d’enzatgei auter che dalla pictura. Jeu hai lu visitau plirs cuors da luvrar cun arschella e sun sefascinaus per quella tecnica», di Hubert Venzin. El ha buca mo cumprau ils indrezs necessaris per quella lavur. Dapi lu ha el scaffiu nundumbreivlas lavurs ord quei material: «Tut ei buca gartegiau ni ei iu empaglia.» Vaccas rientas, cauras e capricorns mo era figuras da carstgauns cumbinadas cun cuschas paradeschen sper ses maletgs ella Aquarella a Rueras sper sia casa. «Luvrar cun arschella entochen ch’ina sculptura ei finida ei in process fetg cumplex. Ei tonscha buca cun formar in object. Barschar e per exempel era glasuras pretendan lavur endinada. Tut quei ei adina era cumbinau cun empau tensiun, pertgei ina ga ni l’autra dat ei ina surpresa,» constatescha igl artist. Tgei surpresas che quei ei sa ina e scadin admirar entochen primavera ella Aquarella a Rueras.