Lectura Rumantscha

Reducir sin l’essenza – quai è la finamira da la schurnalista, però era dal brischavinars e dal musicist.

In destillat d’aur sursilvan

Suenter ina buna tschaina gida in vinars digestiv, almain tenor la sabientscha populara. E sch’il vinars è lura anc bun, lura è quai in mument da plaschair pur. Quai è precis quai che Beni Simeon e Robert Cathomas da la destillaria Daguot a Glion tschertgan: in vinars che gusta bain. E quai fan els cun grond success. Da l’organisaziun naziunala DistiSuisse han els survegnì gist trais medaglias d’aur e duas d’argient per lur destillats cun ampuauna, tscharescha, ervas e café. 

In destillat musical

Roland Vögtli aka «Cha da Fö» tutga tar ils enconuschents «singer-songwriters» da la Rumantschia. L’um da Scuol è puspè sin turnea il november 2025, cun veglias chanzuns da ses album «automatic», ma era cun novas creaziuns. Sia musica è per uschè da dir in destillat da sia vita, u ditg cun ses agens pleds: «Eu am fetsch las grondas dumondas: Chi sun eu? Possa acceptar mincha part da mai? Ingio esa lö per svilup?»

In destillat che sto anc madirar

La Scola politecnica federala Turitg (SPFT) ha publitgà in rapport da bun 70 paginas, nua che las prioritads da las investiziuns da traffic svizras enfin l’onn 2045 vegnan preschentadas. Il resultat da quest rapport: Per il tunnel che duess liberar il vitg da Beiva dal traffic da transit na datti nagins daners da Confederaziun. Il destillat «tunnel da Beiva» sto damai probablamain anc madirar intgins onns.

A revair e bun divertiment cun la Lectura Rumantscha!