Persunal ed ospidals da la regiun stan davant futur malsgür

Davo la decisiun da mardi saira esa chapibel cha’l persunal da l’Ospidal d’Engiadin’Ota as fa pissers davart l’agen futur. Eir pella presidenta da l’Uniun grischuna dal persunal da chüra, Renate Rutishauser, esa evidaint chi’s va a la tschercha da nouvas opziuns da lavur. Las persunas ingaschadas douvran üna perspectiva. Per part s’hajan ellas forsa eir domiciliadas là culla famiglia. «I’s sto eir dumandar: Co vaja inavant?», disch Renate Rutishauser. «Ingio chatta üna soluziun adequata? Spordscha la regiun insomma amo alch, ingio ch’eu poss lavurar i’l sectur ch’eu giavüsch? O es forsa propa üna müdada giò la Bassa ün’alternativa valabla?

Tschertas collavuraturas e tscherts collavuraturs hajan nempe fingià surgni offertas da lavur da la Bassa. Renate Rutishauser disch cha l’attenziun mediala haja natüralmaing manà a quai cha quista situaziun es cuntschainta e chi s’es dvantà attent sün quai illa Bassa ed uossa as lessa gugent guadagnar a quistas persunas dal fat per sai svess.

Inavant disch la presidenta cha l’Uniun grischuna dal persunal da chüra s’ingascharà per cha las collavuraturas ed ils collavuraturs vegnan dudits, ch’els survegnan üna vusch e chi’s tils spordscha üna perspectiva. I’s saja fingià in contact cun differentas persunas respunsablas e cuntinuescha cun quai. «I nu po bain na esser cha nus scolain qua tantas persunas dal fat o tillas occupain per lung temp. E cha nus tillas perdain lura! Güsta in temps dal müdamaint demografic chi guarda oura dramatic pel Grischun.» Il privel cha’l Grischun perda güsta in temps da mancanza da persunal collavuraturas e collavuraturs dal fat es nempe qua.

Eir la Val Puschlav es pertocca

Il destin da l’ospidal Samedan pertocca eir las valladas dal Süd. Quellas nun han però gnü ingün pled illa votaziun. E quai saja stat d’acceptar, ha dit Giovanni ­Jochum, il president cumünal dal Puschlav e president dal cussagl da fundaziun da l’ospidal illa val: «Id es clermaing democratic e quai vulaina eir acceptar sco cumün na involvà. Üna tscherta intschertezza exista però, perquai chi nu’s sa che cha’l plan B es.»

L’ospidal i’l Puschlav ha üna cunvegna da prestaziun tant cun Samedan, sco eir cun Cuoira. Las prosmas eivnas s’examinaraja uossa che chi resta amo da quai o chi’s sto chattar otras soluziuns. Per exaimpel ha Puschlav serrà avant tschinch ons la partiziun da parturir. Ed avant trais ons s’haja eir dat sü la chirurgia ed anestesia. Scha quist’offerta svanischa uossa eir our da l’Engiadin’Ota, daja ün problem, ha Giovanni Jochum agiunt. «Üna mamma cun döglias nu po viagiar dal Puschlav fin a Cuoira.» Sur da quists cas s’haja intant fingià discurrü cul schef dal departamaint. Il president cumünal dal Puschlav fa però quint cha’l Chantun mantegna ün provedimaint da sandà decentral illa regiun, specialmaing per mammas futuras.

Scuol as prepara sün ün «worst case»

Eir il directur e schefmeidi per anestesia e cas urgiaints a l’ospidal a Scuol, Joachim Koppenberg, es preoccupà da la situaziun in Engiadin’Ota – il NA haja eir consequenzas per els. Tenor el pudessa dar cha’l persunal desdia bainbod la plazza da lavur ed uschea füssa pussibel chi detta fingià dürant la stagiun ota d’inviern problems in connex culla sporta medicinala in Engiadin’Ota. Per quista situaziun voul il directur da l’ospidal a Scuol esser pront. Singulas annunzchas sün plazzas da lavur ha Joachim Koppenberg fingià surgni, ma l’ospidal Scuol ha fingià daspö ons üna situaziun da plazzas da lavur fich stabila.

Sportas da las partiziuns da radiologia e da l’ortopedia ha Scuol retrat per part da Samedan. «Gugent vessna retrat inavant las sportas da l’ospidal Samedan, ma stuvain uossa tscherchar alternativas», disch il directur dal Center da sandà Engiadina Bassa. Tenor sias infuormaziuns s’esa in stret contact per chattar soluziuns in vista a la stagiun d’inviern chi sta davant porta.