Proget cun 90 chanzuns d’iffaunts
In ün nouv proget da musica vegnan s-chaffidas 90 chanzuns d’iffaunts per puter e vallader. Daniel Manzoni ho già fat püs albums per iffaunts, il nouv ho nom «Arumballabum» e vain uossa registro – traunter oter eir dad el svess.
Il proget da chanzuns da Daniel Manzoni dess esser ün plaschair per scoulas e scoulinas per imprender e mantgnair il rumauntsch. El svess ho già fat püssas chanzuns e püs albums per iffaunts, las chanzuns pel nouv proget cul nom «Arumballabum» ho’l cumanzo a scriver aunz 10 ans. Sur ün an registreschan uossa 25 persunas las chanzuns in divers studios, traunter oter eir in chesa RTR. La fin dess que der ün proget cha tuots paun chanter cun 90 chanzuns e davart divers temas.
Las chanzuns vegnan chantedas da musseders da scoulina e da magistras – traunter oter eir da Daniel Manzoni chi’d es musseder da scoulina. «L’ideja es eir cha que sun persunas chi daun scoulina e scoula e chi drouvan zieva alura eir quistas chanzuns», declera l’iniziant dal proget ed agiundscha: «Il proget dess esser fich daspera als iffaunts e nu dess esser memma artificiel e memma professiunel, dimpersè propi cun quellas chanzuns ch’els odan i’l minchadi.»
La spüerta vain stimeda
«Tuot las chanzuns sun concepidas cun ün bun s-chazi da pleds ed ün ritem cha’s po druver sainz’oter in scoulina ed a scoula per imprender rumauntsch u simplamaing our da plaschair da tadler musica», declera Daniel Manzoni. Las persunas d’instrucziun stiman quista spüerta, perque cha que nu do fich bgeras chanzuns rumauntschas per druver in scoula. Uscheja eir Andrea Roffler chi’d es mussedra a Schlarigna: «Eau chat fich important, nus nu vaivans tauntas chanzuns in rumauntsch, e forsa eir ün po lungurusas. Daspö cha Daniel fo las chanzuns vainsa üna granda schelta ed uossa amo dapü schelta.» Cha que saja simplamaing fantastic. Listess vezzan quai las duos magistras da Silvaplauna Sibylle Häberli e Tanja Clalüna-Cazin. «Per me es que fich important. Eau drouv mincha di in scoulina da quistas chanzuns, perque cha’ls iffaunts nu creschan pü sü tuots cun rumauntsch. Per nus esa ün’importanta chosa da musser rumauntsch e quistas chanzuns güdan fich», disch Sibylle Häberli.
Sustegn finanziel
Per fer quist proget ho Daniel Manzoni survgnieu sustegn finanziel da diversas instituziuns, traunter oter da la regiun Malögia, da differentas vschinaunchas e da singulas instituziuns. Actuelmaing haun els ün büdschet da 90 000 francs. Tuot tenor cu cha que vo sü, paun las chanzuns alura gnir druvedas gratuitamaing u cha que as stu pajer. Scha tuot vo tenor plan, alura dessan tuot las chanzuns esser registredas fin in gün 2026.
Gust da leger dapli?