Lectura rumantscha

La Lectura Rumantscha sortescha oz las trais istorgias tenor stagiuns. Buna lectura!

«Quattro stagioni»

Ina da mias pizzas preferidas è la «quattro stagioni»! Cun quella schelta han ins quatter pizzas enina, senza propi stuair sa decider. Damai: las quatter stagiuns èn era il fil cotschen dal «Calender Romontsch 2026», l’annuari tradiziunal sursilvan che è vegnì publitgà quests dis. Ina gronda sfida è tenor il responsabel dal chalender da chattar persunas che scrivan gugent rumantsch – tuttina en tge stagiun.

Enfin primavaira

Ospitals han crisa en l’entira Svizra, uschia era en l’Engiadin’Ota. La proxima primavaira vegn l’ospital regiunal d’Engiadin’Ota a Samedan pli probabel betg pli dad esser abel da pajar ses quints. Suenter il NA da trais vischnancas purtadras ad ina finanziaziun publica da 51 milliuns francs regia ina gronda intschertezza. E la societad che maina l’ospital vegn a dumandar per in uschenumnà «moratori». Tge che quai munta exact, quest pled giuridic, ha noss redactur engiadinais Michael Steiner dumandà in expert.

Avunda chaud d’enviern

Silvie Schaufelberger da Tenna è ina da las paucas che sa anc co utilisar in «taler». Cun quest vegl apparat producescha ella numnadamain differents products da launa sco tastgas, chapitschas e plimatschs. Avant che la launa da las nursas da Zalön en Stussavgia sa tschenta dentant sin il taler, è necessaria ina lunga procedura. Has ti mirveglias?

Bun divertiment!